პარტია „ერთიანი საქართველოს“ თავმჯდომარე ნინო ბურჯანაძე, ეკა ბესელიას ინიცირებულ კანონპროექტს გამოეხმაურა, რომელიც ბიულეტენების გადათვლის მექანიზმის შექმნას გულისხმობს.
ბურჯანაძე პარლამენტის თავმჯდომარეს არჩილ თალაკვაძეს მიმართავს და აცხადებს, რომ კანონპროექტი დაჩქარებული წესით უნდა განიხილონ.
„ოთხშაბათს ეკა ბესელიამ ინიცირება გააკეთა და ყველა ოპოზიციამ დადებითი კომენტარები გავაკეთეთ. დღეს ბიუროზე ხდება ინიცირება და ვითხოვთ დაჩქარებული წესით განხილვას. მივმართავ ბიუროს, ბატონ არჩილ თალაკვაძეს დაუჭირონ მხარი ქალბატონი ეკას მოთხოვნას, რომ დაჩქარებული წესით იქნეს განხილული ეს კანონპროექტი, იმიტომ რომ მოესწროს არჩევნებამდე.
„თუ „ქართული ოცნება“ ამას ჩააგდებს და უარს იტყვის, ეს კიდევ ერთი დასტური იქნება იმისა, რომ მას სამართლიანი არჩევნების ეშინია.
რას ვითხოვთ ოპოზიცია? იმას რომ გაყალბების შესაძლებლობა არ მიცვეთ ხელისუფლებას.
ის რაც გააკეთა “ქართულმა ოცნებამ” 2016 წელს, როდესაც მე 700 საჩივრიდან არცერთი არ დამიკმაყოფილა და არცერთი უბანი არ გახსნა, ეს უნდა გამოირიცხოს. იმიტომ რომ…
რა თქმა უნდა ჩვენ მაინც მივაღწევთ უბნების გახსნას. მე არ მსიამოვნებს ამას რომ ვამბობ, მაგრამ, ვთქვი რომ – თუ იგივეს გამოიკეთებს „ქართული ოცნება“, რაც 2016 წელს გამიკეთა, დავალეწავ იმ ყუთს თავზე მეთქი. ოღონდ, ამას ნამდვილად გავაკეთებ“, – განაცხადა ბურჯანაძემ „პალიტრანიუსის“ ეთერში.
ცნობისთვის, პარლამენტის დამოუკიდებელმა დეპუტატმა ეკა ბესელია, მოითხოვს დაჩქარებული წესით იქნას განხილული კანონპროექტი, რომელიც ბიულეტენების გადათვლის მექანიზმის შექმნას გულისხმობს.
