„ნოვოვაქსის“ და „Johnson&Johnson“-ის ვაქცინა ქვეყანაში, სავარაუდოდ, ივლისში შემოვა. ამის შესახებ ჯანდაცვის მინისტრის მოადგილემ, თამარ გაბუნიამ იმუნიზაციის საბჭოს დასრულების შემდეგ განაცხადა.

როგროც გაბუნია ამბობს, აცრის მსურველი მოქალაქეები  საკუთარ დოზებს უნდა დაელოდონ.

„შესაძლოა იმედგაცრუება გამოიწვიოს კონკრეტულ შემთხვევაში, როდესაც მოქალაქე რეკავს და ვაქცინა არ არის, მაგრამ მოკლე ხანში გვექნება „სინოფარმის“ დამატებითი დოზების მობილიზების შესაძლებლობა, „სინოვაკიც“ დაგვეხმარება, ასევე „კოვაქსიდან“ მოლოდინი გვაქვს, რომ ივლისიდან „ნოვოვაქსი“ და „Johnson&Johnson“ უნდა დაემატოს.

მანამდე პროცესი საკმაოდ აქტიურია. აცრის დღიური 5 ათასი მაჩვენებელი საკმაოდ კარგია. მოქალაქეები, რომლებიც ვაქცინაციისთვის არიან განწყობილნი, უნდა დაელოდონ საკუთარ დოზას. მეც ველოდები ჩემს დოზას, ჯერ არ გამიკეთებია ვაქცინა, მიუხედავად იმისა, რომ ბევრჯერ მქონდა ამის შესაძლებლობა, მაგრამ დაველოდები, ვიდრე მოსახლეობის დიდი რაოდენობა არ იქნება მოცული“,- განაცხადა გაბუნიამ.

ცნობისთვის, 11 მაისის მონაცემებით საქართველოში 67 136 აცრა ჩატარდა.