უკვე ერთი კვირაა რაც აზერბაიჯანსა და სომხეთს შორის „მთიანი ყარაბაღის“ გამო დაპირისპირება გრძელდება.
მსხვერპლის შესახებ ორივე მხრიდან ურთიერთგამომრიცხავი განცხადებები კეთდება. თუმცა ფაქტი სახეზეა, რომ მსხვერპლის რაოდენობა ორივე მხრიდან დიდია.
მხარეები ცეცხლის შეწყვეტის დარღვევას ერთმანეთს აბრალებენ, გაერო ორივე მხარეს მოუწოდებს ცეცხლი შეწყვიტონ და მოლაპარაკები ყოველგვარი წინაპირობის გარეშე დაიწყონ.
„თუ სომხების დახმარება სურთ, უთხრან მათ, რომ ცეცხლი შეწყვიტონ, გაათავისუფლონ ტერიტორიები და უკან დაიხიონ. უთხრან რომ ეს სამართლიანი პოზიციაა და მშვიდობისკენ მიმავალი პირველი ნაბიჯია, ამის შემდეგ ჩვენც გავჩერდებით“, – განაცხადა ილჰამ ალიევმა, ალჯაზირასთან ინტერვიუს დროს, ამ ინტერვიუს აზერბაიჯანული მედია ავრცელებს.
აზერბაიჯანის მხარის ცნობით, რამდენიმე დღის წინ სომხურმა ბატალიონმა ხელში სამხედრო დროშა ჩაიგდო, თუმცა სომხურმა მხარემ ეს ფაქტი უარყო და აზერბაიჯანის მხრიდან მორიგი დეზინფორმაცია უწოდა.
შეტაკებები და ცხელი წერტილები მთლიან სასაზღვრო ზოლში მიმდინარეობს, თუმცა ბრძოლების ინტენსიობით გამოირჩევა ფუზულის რაიონი, რომელიც ირანის საზღვართანაა. ირანის ახლომდებარე სოფლის მაცხოვრებლები შემაღლებულ ადგილებიდან აკვირდებიან საარტილერიო დარტყმებს.
მიუხედავად იმისა, რომ აზერბაიჯანული მხარე მთიან ყარაბაღში ჯერ არ შესულა და შეტაკებები ყარაბაღთან ახლო მიმდებარე ტერიტორიებში ხდება, აზერბაიჯანულმა უპილოტოებმა მოახერხეს სტეფანაკერტის (ხანდკენტი) დაბომბვა. რამდენიმე დღის წინ კი ერევანთან ახლოს საჰაერო სივრცეში უპილოტოები შენიშნეს
„ჩვენ სამი ჩამოვაგდეთ და მეოთხეს ვეძებთ, მინდა გაცნობოთ რომ მეოთხესაც ჩამოვაგდეთ“, – წერს ფაშინიანი სოციალურ ქსელში.
