“ოპოზიცია არის არაადეკვატური. მას შემდეგ, რაც ვერ დაამტკიცა არჩევნების გაყალბება, მაინც ჰგონია, რომ არჩევნები გაყალბებულია და ამ მოტივით ითხოვს ხელახალ არჩევნებს, – ამის შესახებ „გირჩის“ წევრმა, იაგო ხვიჩიამ განაცხადა.
„ამ ამბავში სხვადასხვა დოზით, მაგრამ ორივე დამნაშავეა და ორივე იღებს ამ პასუხისმგებლობას. თუ უნდათ გამოსწორება, ორივემ თავიანთი პოზიციებიდან უკან უნდა დაიხიოს. ქოცებმა კეთილი ინებონ და საკუთარ დანიშნულ პრეზიდენტს რურუა შეაწყალებინონ, ხოლო ოპოზიცია დათმობაზე უნდა წავიდეს და თავი დაანებოს უაზრო მოთხოვნას ვადამდელი არჩევნების შესახებ.
ოპოზიცია არის არაადეკვატური. მას შემდეგ, რაც ვერ დაამტკიცა არჩევნების გაყალბება, მაინც ჰგონია, რომ არჩევნები გაყალბებულია და ამ მოტივით ითხოვს ხელახალ არჩევნებს. ხელისუფლებაც არაადეკვატურია, ჰყავს თოჯინა პრეზიდენტი, რომელსაც რასაც უნდა, იმას გააკეთებინებს. ამ შემთხვევაში თითქოს პრინციპულობა გამოაჩენინეს და რურუას შეწყალებაზე უარი ათქმევინეს, რამაც ეს მოლაპარაკება რეალურად ჩაშალა.
იმედი მაქვს, პარტნიორები საქართველოს ხელისუფლებას ჭკუაზე მოიყვანენ. თუ საქართველოს ხელისუფლება მოვა ჭკუაზე, ავტომატურად დიდი ალბათობით, ოპოზიცია მოვა ჭკუაზე. თუ არ მოვა, უჭკუოდ დარჩება და გასაგები იქნება, რომ ხელისუფლება მასთან მართალი იყო. იმ კონცერტმა, რაც ხელისუფლებამ და ოპოზიციამ მოაწყვეს დანიელსონის ჩამოსვლის დროს, ფაქტობრივად, ჩვენს პარტნიორებთან საქართველოს თავის მოჭრა გამოიწვია. ამას ან გამოვასწორებთ ან ნელ-ნელა რუსეთის გუბერნიისკენ სვლას დავიწყებთ“, – განაცხადა იაგო ხვიჩიამ.
