ოპოზიციური პარტიები, რომლებიც არჩევნების მეორე ტურში გადავიდნენ მაჟორიტარულ ოლქებში, უკვე მეორე ტურისთვის ემზადებიან, – ამის შესახებ პარლამენტის თავმჯდომარემ „რუთავი2“-ის ეთერში განაცხადა.
არჩილ თალაკვაძემ აღნიშნა, რომ ეს, ერთ-ერთი პოზიტიური და მნიშვნელოვანი გარემოება არის.
„ჩვენ უკვე გვაქვს ინფორმაცია, რომ ოპოზიციური პარტიები, რომლებიც მეორე ტურში გადავიდნენ მაჟორიტარულ ოლქებში უკვე ემზადებიან მეორე ტურისთვის, მათ შტაბებში არის აქტიური სამზადისი, მოხდა გარკვეული სარეკლამო მასალების განახლება და რა თქმა უნდა, ეს არის ერთ-ერთი პოზიტიური და მნიშვნელოვანი გარემოება.
მე არ მინდა, რომ გუშინდელი შეხვედრის ფარგლებში განხილულ საკითხებზე კონკრეტიკა შემოვიტანო, ვინაიდან ჩვენ ყველამ პირობა დავდეთ, რომ შეთანხმებამდე არ გავასაჯაროებთ იმ საკითხებს, რაზეც იყო მსჯელობა. მე ვფიქრობ, ამ საზოგადოებას არ სჭირდება ისეთი ხელისუფლება, რომელსაც თავისი პირობის დაცვა არ შეუძლია და რომელიც თავის სიტყვას გატეხავს“, – განაცხადა არჩილ თალაკვაძემ.
ცნობისთვის, ოპოზიციური პარტიები ბოიკოტის რეჟიმში იმყოფებიან და უარს ამბობენ არჩევნების მეორე ტურში მონაწილეობაზე.
გაერთიანებული ოპოზიცია რიგგარეშე არჩევნების დანიშვნას და ცესკოს ხელმძღვანელის, თამარ ჟვანიას დაკავებული თანამდებობიდან გადაყენეას მოითხოვს.
ევროკავშირისა და აშშ-ს ელჩები ფასილიტაციას უწევენ მმართველი პარტიისა და ოპოზიციის კონსესუსამდე მისვლას, რათა დაძლეულ იქნას არსებული პოლიტიკური კრიზისი.
