საქსტატის წინასწარი შეფასებით, მიმდინარე წლის ოქტომბერში, წინა წლის შესაბამის თვესთან შედარებით, საქართველოს ეკონომიკა 6,9%-ით გაიზარდა, ხოლო 2021 წლის პირველი ათი თვის ზრდის საშუალო მაჩვენებელი 10,5% იყო.
აღსანიშნავია, რომ ოფიციალური მონაცემების გამოცხადებამდე ერთი დღით ადრე, გუშინ პრემიერმინისტრმა ღარიბაშვილმა თქვა, რომ ოქტომბრის თვის ეკონომიკური ზრდის მაჩვენებელი დაახლოებით 7%-მდე იქნებოდა.
საქსტატის ანგარიშში ნათქვამია, რომ 2021 წლის ოქტომბერში, წინა წლის შესაბამის პერიოდთან შედარებით ზრდა შეინიშნებოდა შემდეგ დარგებში: დამამუშავებელი მრეწველობა, ტრანსპორტი და დასაწყობება, ხელოვნება, გართობა და დასვენება, ელექტროენერგიის, აირის, ორთქლის და კონდიცირებული ჰაერის მიწოდება, საფინანსო და სადაზღვევო საქმიანობა, სასტუმროები და რესტორნები, ვაჭრობა. კლების ტენდენცია კი დაფიქსირდა მშენებლობის დარგში.
საქსტატის ანგარიშში მითითებულია, რომ 2021 წლის იანვარ-ოქტომბერში საქონლის ექსპორტი 24,9%-ით, ხოლო იმპორტი 22,3%-ით გაიზარდა. შესაბამისად, საგარეო სავაჭრო ბრუნვა 23%-ით არის გაზრდილი.
მიმდინარე წლის ოქტომბერში ახლადრეგისტრირებულ საწარმოთა რაოდენობა წლიურად 4,7%-ით, 4 236-მდე გაიზარდა. ამავე პერიოდში დღგ-ს გადამხდელ საწარმოთა ბრუნვამ 25,6%-ით 9,74 მილიარდ ლარამდე მოიმატა.
ეკონომიკური ზრდის ანგარიში ქვეყანაში არსებული ინფლაციის შესახებ მონაცემებსაც მოიცავს და აღნიშნულია, რომ ოქტომბერში წლიური ინფლაცია 12,8%-იყო. აღსანიშნავია, რომ ეს ბოლო 10 წელში ფასების ზრდის რეკორდულად მაღალი მაჩვენებელია.
შეგახსენებთ, რომ საქართველოს ეკონომიკის შემცირება გასული წლის მარტიდან დაიწყო, რაც კორონავირუსით გამოწვეული პანდემიის ფონზე მიღებულ შეზღუდვებს უკავშირდებოდა. ეკონომიკის ვარდნის ტენდენცია გაგრძელდა მომდევნო თვეებშიც. ბოლო გათვლების მიხედვით, 2020 წლის მეორე კვარტალში ქვეყნის მთლიანი შიდა პროდუქტი 13,2%-ით, მესამე კვარტალში — 5,6%-ით, ხოლო მეოთხე კვარტალში 6,8%-ით შემცირდა. წლიურად, 2020-ში საქართველოს ეკონომიკამ 6,8%-ით იკლო.
რაც შეეხება მიმდინარე წლის სტატისტიკას, პირველ კვარტალში ქვეყნის ეკონომიკა 4,1%-ით შემცირდა, მერე კვარტალში 28,9%-ით გაიზარდა, ხოლო მესამე კვარტალში 9%-იანი ზრდა დაფიქსირდა. მთავრობა წელს ეკონომიკის 10%-ით გაზრდას ელოდება.
