ფინანსთა მინისტრის, ლაშა ხუციშვილის განცხადებით, სამივე სარეიტინგო კომპანიის (Fitch;S&P;Moody’s) შეფასებით, საქართველო დაუბრუნდა პანდემიამდელ მდგომარეობას. ამის შესახებ ფინანსთა მინისტრმა ბრიფინგზე განაცხადა.
„ძირითადი ფაქტორი, რის გამოც საქართველო დაუბრუნდა პანდემიამდელ მაჩვენებლებს, არის ქვეყნის მიერ გატარებული მყარი მაკროეკონომიკური პოლიტიკა, რასაც მხარს უჭერენ საერთაშორისო ორგანიზაციები და საფინანსო ინსტიტუტები. შეფასებებში ერთ-ერთი მნიშვნელოვანი ფაქტორი, ასევე, გახდა ქვეყნის ეკონომიკური ზრდის ტემპები. სულ ახლახან, აზიის განვითარების ბანკმა გამოაქვეყნა ინფორმაცია საქართველოს ეკონომიკური ზრდის შესახებ.
თქვენ იცით, რომ საერთაშორისო სავალუტო ფონდი იყო ერთ-ერთი ბოლო, რომელმაც საქართველოს ეკონომიკური ზრდის პროგნოზი გაუზარდა 7,7%-მდე, რაც პრაქტიკულად იყო საბაზისო სცენარი, რომელიც ჩვენ წარვადგინეთ პარლამენტში. აზიის განვითარების ბანკის პროგნოზით, წელს საქართველოს ეკონომიკა 8.5%-ით გაიზრდება. როგორც ცნობილია, 7 თვის შეფასებებით ეკონომიკური ზრდა აღემატება 12%-ს. პოზიტიურ სცენარში 10,2%-იანი ეკონომიკური ზრდა გვაქვს წარდგენილი და ყოველდღიური მონაცემები მიუთითებს, რომ ეკონომიკური ზრდის ტემპი მიმდინარეობს სწორედ პოზიტიური სცენარის მიმართულებით“, – აღნიშნა ფინანსთა მინისტრმა, ლაშა ხუციშვილმა.
