“ქართულ ოცნებას” არ მივცემთ იმის თქმის საშუალებას, რომ ოპოზიციამ მოლაპარაკებები ჩაშალა”,- ამის შესახებ “ნაციონალური მოძრაობის” წევრმა ხატია დეკანოიძემ ბრიფინგზე განაცხადა,
“მოლაპარაკებების მეხუთე რაუნდზე ინფორმაცია არ მაქვს. ჩვენ ვსაუბრობთ რეჟიმზე და ამ ხელისუფლებაზე, რომელმაც მიიტაცა ხელისუფლება და მოლაპარაკებების პარალელურად კობახიძის პირით ბიძინა ივანიშვილი, “ქართული ოცნების” პარტია მთლიანად და ერთპარტიული პარლამენტი ღიად საუბრობდა იმაზე, რომ რეპრესიები უნდა დაიწყოს ოპოზიციური პარტიების მიმართ, მათ შორის, “ნაციონალური მოძრაობას” ემუქრებოდა რეგისტრაციიდან მოხსნით და ღია აგრესიაზეც გადავიდა.
მე მოლოდინი ამ მოლაპარაკებებიდან არ მაქვს იმიტომ, რომ არ ვფიქრობ, რომ კეთილგონიერია ივანიშვილი. პირიქით მან მიიღო ერთპარტიული პარლამენტი, რაც არის უმძიმესი შედეგი ქვეყნისთვის და მისი პარტიისთვის პირველ რიგში. რა თქმა უნდა, ჩვენ არ მივცემთ “ქართულ ოცნებას” იმის თქმის საშუალებას, რომ ოპოზიციამ ჩაშალა მოლაპარაკებები, ამიტომ ისევე როგორც მთელი ოპოზიცია, “ერთიანი ნაციონალური მოძრაობაც” მიიღებს მონაწილეობას ამ ინფორმაციის გაცვლაში, რომელსაც მე ამ წუთას მოლაპარაკებებს ვერ დავარქმევ”, – განაცხადა დეკანოიძემ.
