მივიღეთ გადაწყვეტილება, რომ კონტრაქტი დაიდება და უკვე პროექტირება და სამუშაოები დაიწყება საქართველოში ფართოზოლოვანი ინტერნეტ-ინფრასტრუქტუროს განვითარების პროექტის ფარგლებში, – ამის შესახებ მთავრობის სხდომის დასრულების შემდეგ ეკონომიკის მინისტრმა ნათია თურნავამ განაცხადა.
როგორც მინისტრმა აღნიშნა, ოზურგეთში ფართოზოლოვანი ოპტიკურ-ბოჩკოვანი ინტერნეტ-ინფრასტრუქტურის გაყვანა სავარაუდოდ წლის ბოლომდე დასრულდება.
საუბარია ე.წ. Open Net-ის პროექტზე, რომელიც ხორციელდება საქართველოში მთავრობის და კერძოდ ეკონომიკის სამინისტროს კოორდინირებით.
„ზოგადად ეს პროექტი არის ძალიან მასშტაბური და საქმე ეხება ფართოზოლოვანი ოპტიკურ-ბოჩკოვანი ინტერნეტ-ინფრასტრუქტურის გაყვანას საქართველოს მთელი მასშტაბით, რაც მოიცავს ათასამდე დასახლებულ პუნქტს მთლიანობაში. თქვენ იცით, რომ კოვიდის ფონზე ძალიან მნიშვნელოვანია, რომ ჩვენ კიდევ უფრო მეტად გადავეწყოთ დიჯიტალური ურთიერთობის პლატფორმაზე და გავხდეთ უფრო მეტად ინტერნეტიზირებული, უფრო მეტად შემოვიდეს ელექტრონული სერვისები“, – განაცხადა ნათია თურნავამ.
ოზურგეთის რაიონის 49 სოფელს მაღალი ხარისხის ინტერნეტი ექნება
