დღეიდან, პანკისის ხეობის მიმართულებით, სიჩქარის კონტროლის 4 სექცია ამოქმედდა. შინაგან საქმეთა სამინისტროს ინფორმაციით, ნებადართული სიჩქარეები 60- დან 80 კმ/საათის შუალედებში მერყეობს.
ახალდამონტაჟებული ოთხი სექცია მოიცავს მონაკვეთს: სოფელ მატნიდან – დუისამდე, სოფელ დუისიდან- ჯოყოლომდე, სოფელ ჯოყოლოდან- დუისამდე და სოფელ დუისიდან- მატნამდე.
„ეს ახალი სექციებია და მძღოლებისა და მგზავრების უსაფრთხოებისთვის დამონტაჟდა. კახეთში, სახელმწიფოებრივი მნიშვნელობის გზებზე უკვე ბევრგან არის განთავსებული“,- განუცხადეს „პრაიმტაიმნიუსს“ უწყებაში.
ახმეტის მუნიციპალიტეტის მერი, იოსებ ქარუმაშვილი განმარტავს, რომ გზებზე ავტოსაგზაო შემთხვევები ხშირია.
„გზის არცერთი მონაკვეთი, სადაც კამერა დამონტაჟდა, მუნიციპალური საკუთრება არ არის. ეს სახელმწიფოებრივი მნიშვნელობის გზებია, სექციური სიჩქარის მაკონტროლებელი აქამდე არ იყო, ეს პირველია. სამწუხაროდ, გვაქვს ავტოსაგზაო შემთხვევები, მათ შორის მძიმეც. საგზაო დეპარტამენტი არეგულირებს ნიშნების განთავსებასაც და ვიმედოვნებ, ყველა ყურადღებით იქნება“,- განაცხადა ქარუმაშვილმა.
საქართველოს მასშტაბით, სიჩქარის კონტროლის სექციები, უკვე 1213 კილომეტრი სიგრძის საავტომობილო გზაზეა განთავსებული.
ავტორი: ხათუნა გულიაშვილი
