გრიგოლ ვაშაძე მე-10 მოწვევის პარლამენტში შესვლაზე უარს ამბობს. “თუ მაჟორიტარულ არჩევნებში დავმარცხდებოდი, ჩემს ქუთაისელ გოგო-ბიჭებს შევპირდი, რომ პარტიული სიით პარლამენტში არ შევიდოდი” – განაცხადა რუსთავი 2-ის ეთერში გრიგოლ ვაშაძემ.
ასევე, მან შეაფასა საარჩევნო გარემო და მეორე ტურში ოპოზიციის მონაწილეობის შემთვევაში, სავარაუდო შედეგები. აღნიშნა, რომ ცესკო არსებულ ვითარებაში სახელმწიფოცაა და ლუდოვიკო მე-14-ეც.
პარტია ნაციონალური მოძრაობის თავმჯდომარე ექსპრეზიდენტ მიხეილ სააკაშვილს ეთანხმება და მაგალითად, მისი ფრაზა მოჰყავს – ცესკომ სხვა გზა არ დაუტოვა ოპოზიციას გარდა იმისი, რომ პროცესები ქუჩაში გადასულიყო.
კითხვას, რამდენად რეალისტურია არჩევნების მეორე ტურში 16 საარჩევნო ოლქში ოპოზიციამ მოიგოს და მე-10 მოწვევის პარლამენტში უმრავლესობით ოპოზიცია შევიდეს, ნაციონალური მოძრაობის პარტიის თავმჯდომარე გრიგოლ ვაშაძე პასუხობს, რომ ცესკომ 30 თუ 40 უბანი გადათვალა ფორმალურად, მერე გამოაცხადა, ცესკოც მე ვარ, ლუი მე-14-ეც და სახელმწიფოცო, რეალისტური არ არის მეორე ტურში სრული გამარჯვება.
რეალისტური იქნებოდა, თუ ცესკო მიიწვევდა სახალხო დამცველს, არასამთავრობო ორგანიზაციებს და სამართლიანად შეძლებდნენ შედეგების გადამოწმებას, მაგრამ არჩევნების ღამეს, მიხეილ სააკაშვილმა ძალიან სწორი ბრძანა: სამართლებრივი პროცესის დაკეტვით, ოპოზიციას ქუჩის პროტესტის გარდა აღარაფერი დარჩაო. ვსაუბრობთ მხოლოდ იმაზე, რომ გლდანში, სამგორში, ისანში, რუსთავსა და თელავში ოპოზიციას უნდა მოეგო. ქუთაისზე არაფერს ვამბობ, რადგან ქუთაისელ გოგო-ბიჭებს პირობა მივეცი, თუ მაჟორიტარული წესით პარლამენტში ვერ შევედი, სიით შესვლაზე უარს ვამბობ-მეთქი.” – ამბობს რუსთავი 2-ის ეთერში გრიგოლ ვაშაძე.
