ამ წუთებში საკანონმდებლო ორგანოსთან მოძრაობა „სირცხვილიას“ აქტივისტები და გიორგი რურუას მეგობრები აქციას მართავენ სახელწოდებით „შეასრულეთ შეთანხმება”.

ისინი ითხოვენ, რომ მმართველმა გუნდმა 8 მარტის შეთანხმება შეასრულოს და პატიმრობიდან გაათავისუფლონ „მთავარი არხის“ ერთ-ერთი მეწილე გიორგი რურუა.

როგორც აქციის მონაწილეები აცხადებენ, დღევანდელ აქციას მშვიდობიანი ფორმა ექნება. ადგილზე სამართალდამცველები არიან შეკრებილები.

„დღევანდელი აქციის მიზანი არის ის, რომ ხელისუფლებას კიდევ ერთხელ შევახსენოთ, რომ 8 მარტის ორივე ნაწილი უნდა შესრულდეს, პოლიტიკური პატიმარი განთავისუფლდეს და უნდა გადავიდეს ახალ საარჩევნო სიატემაზე რისთვისაც ჩვენ უკვე ერთი წელია ვიბრძვით.

,ქართული ოცნების” ხელისფლებას ქვს შანსი შეინარჩუნოს სახე საერთაშორისო საზოგადოების წინ და შეინარჩუნოს სახე მოსახლეობის წინ და მიიღოს პროპორციული საარჩევნო სისტემა.

არანაირი მოლოდინი არ მაქვს, ამ პოლიტიკურმა ძალამ დაამტკიცა არა ერთხელ, რომ მათთვის პირობები, ლოგიკა , რაციონალიზმი არის ძალიან შორს. ვნახავთ რაც მოხდება, აქ ვართ არსად არ მივდივართ,” – აცხადებს ნოდარ რუხაძე.

შეგახსენებთ, რომ დღეს პარლამენტში საკონსტიტუციო ცვლილებებს მესამე მოსმენით უყრიან კენჭს. ოპოზიცია ბოიკოტის რეჟიმშია, „ნაციონალური მოძრაობა“ და „ევროპული საქართველო“ კენჭისყრაში მონაწილეობას არ მიიღებენ. მმართველი გუნდი კი იმედოვნებს, რომ ცვლილებებს საკმარისი მხარდაჭერა ექნება.

საკონსტიტუციო ცვლილებების დამტკიცებას 113 დეპუტატის მხარდაჭერა დასჭირდება. საკმარისი ხმების არსებობის შემთხვევაში, 2020 წლის საპარლამენტო არჩევნები 120/30-ზე პროპორციით გაიმართება.