იურისტი, პოლიტიკური მოძრაობა “ტრიბუნას“ წევრი ლია მუხაშავრია მაჟორიტარობისთვის ნაძალადევის რაიონში იბრძოლებს. როგორც მუხაშავრიამ „პრაიმტაიმნიუსთან“ საუბრისას განაცხადა, მას არჩევნებში გამარჯვების საკმაოდ დიდი შანსი აქვს.
„ვფიქრობ, რომ მარტო მაჟორიტარობის მოგების შანსი კი არ მაქვს, არამედ პარტიასაც მოვუტან ძალიან ბევრ ხმას, რადგან პარტიისთვისაც ძალიან სასარგებლო იქნება ჩემი წარდგენა მაჟორიტარობის კანდიდატად. მე ნაძალადევის რაიონის სკოლაში ვსწავლობდი, იქ გავზარდე, ამიტომ დიდი იმედი მაქვს, რომ ამ ოლქში არჩევნებს მოვიგებ.
„ქართული ოცნების“ კანდიდატი მიხეილ ყაველაშვილი იყო უკვე პარლამენტში და რა გააკეთა ამომრჩევლისთვის, ეს უკვე ყველამ კარგად იცის. მისი სურვილი, რომ ისევ ნაძალადევის მაჟორიტარის სტატუსით შევიდეს პარლამენში, სრულიად მცდარია. ის უნდა ჩამოშორდეს პოლიტიკას“,- განაცხადა მუხაშავრიამ.
კითხვაზე, თავად რას ჰპირდება ამომრჩეველს, მუხაშავრია გვპასუხობს:
„მე ხელს შევუწყობ „ტრიბუნას“ პროგრამის განხორციელებას, ეს გულისხმობს საბანკო მონოპოლიით დაზარალებული ადამიანების უფლებების აღდგენასა და პოლიტიკური ნების შექმნას, ეს გულისხმობს იმას, რომ ყველა კანონის დამრღვევს დაეკისროს პასუხისმგებლობა, მათ შორის, უმაღლესი პოლიტიკური თანამდებობის პირებს, რომლებიც არღვევენ კონსტიტუციას“,- განაცხადა მუხაშავრიამ.
ინფორმაციისთვის, იურისტი ლია მუხაშავრია პოლიტიკურ მოძრაობა „ტრიბუნას“ 15 აგვისტოს შეუერთდა.
