„პატრიოტთა ალიანსი“ ორ მაჟორიტარულ ოლქში, სავარაუდოდ, მოქმედ დეპუტატებს წარადგენს. ამის შესახებ პარტიის საპარლამენტო მდივანმა გოჩა თევდორაძემ განაცხადა.
როგორც თევდორაძემ „პრაიმტაიმთან“ აღნიშნა, „პატრიოტთა ალიანსი“ არჩევნებში მონაწილეობას დამოუკიდებლად მიიღებს და არც ერთ პოლიტიკურ ძალასთან ითანამშრომლებს.
„ჩვენ ვფიქრობთ, რომ 30 მაჟორიტარულ ოლქში საკუთარი კანდიდატები გვეყოლება -არ გამოვრიცხავ, რომ დაახლოებით, ორი მოქმედი დეპუტატი იყოს. პარტია, ჯერჯერობით, ჩამოყალიბების პროცესშია, ამიტომ სახელებსა და გვარებს, ბუნებრივია, ჯერ ვერ დაგისახელებთ.
ჩვენი პარტია არჩევნებში დამოუკიდებლად მიიღებს მონაწილეობას, ბლოკის სახით -არა. ჩვენ ვფიქრობთ, რომ „ქართულმა ოცნებამ“, როგორც მმართველმა ძალამ, თავისი მოღვაწეობა უნდა დაასრულოს“,- განაცხადა თევდორაძემ.
კითხვაზე, აპირებს თუ არა თევდორაძე მაჟორიტარობისთვის ბრძოლას? „პატრიოტთა ალიანსის“ წარმომადგენელი გვპასუხობს, რომ აღნიშნული საკითხი ნაკლებად სავარაუდოა.
„აქამდე ყოველთვის საარჩევნო შტაბის ხელმძღვანელობა მიწევდა. თუ ახლაც საარჩევნო შტაბის ხელმძღვანელობა მომიწევს, ცხადია, რომელიმე ოლქში მაჟორიტარ კანდიდატად რომ ვიყო წარმოდგენილი, ეს უაზრობა იქნება, ვერ შევძლებ“,- განაცხადა თევდორაძემ.
ინფორმაციისთვის, იმ შემთხვევაში, თუ კორონავირუსის პანდემიამ დღის წესრიგი არ შეცვალა, საპარლამენტო არჩევნები 2020 წლის 31 ოქტომბერს გაიმართება.
ავტორი: ეკატერინე ზარნაძე
