„დღეისათვის საქართველოს პენიტენციურ დაწესებულებებში კორონავირუსის არც ერთი შემთხვევა არ გამოვლენილა და ყველაფერს ვაკეთებთ, რათა მდგომარეობა ამ ნიშნულზე შევინარჩუნოთ”, – ამის შესახებ იუსტიციის მინისტრმა, გოჩა ლორთქიფანიძემ უწყების საქმიანობის შესახებ წლიური ანგარიშის წარდგენისას განაცხადა.
„კოვიდ19-თან ბრძოლა ჩვენი მთავრობის პრიორიტეტია. რა თქმა უნდა, ჩვენთვის პრიორიტეტულია ჩვენი სისტემის თითოეული თანამშრომლის ჯანმრთელობის დაცვა და, ამასთანავე, სისტემა მუშაობდეს სტაბილურად და ეფექტურად. სერვისები უკვე ახალ გარემოებებში, დაწესებული შეზღუდვების დაცვით, შეუფერხებლად მიეწოდება მოსახლეობას. ეს გულისხმობს დისტანციური მუშაობის რეჟიმზე გადასვლას; მაცნეს ვებგვერდზე შესაბამისი სამართლებრივი აქტებისთვის StopCov საქაღალდის შექმნას;
იუსტიციის სახლებსა და საზოგადოებრივ ცენტრებში მომსახურების მისაღებად დაჯავშნის ახალი სისტემის ამოქმედებას. ეს კოვიდის პირობებში მომსახურების მენეჯმენტისა და მისი მართვის საშუალებას იძლევა ისე, რომ დაცული იყოს თითოეული მომხმარებლისა და პერსონალის უსაფრთხოება. დისტანციურ ფორმატზე ადაპტირდა სასწავლო ცენტრის პრიორიტეტული ტრენინგ მოდულები, შეიქმნა დროებითი სანოტარო ბიუროები“, – განაცხადა იუსტიციის მინისტრმა.
მისი თქმით, პენიტენციურ დაწესებულებებში კორონავირუსის არც ერთი შემთხვევა არ დაფიქსირებულა.
„რეგულარულად ხდება პენიტენციური დაწესებულებების დეზინფექცია, მოწყობილია სამედიცინო საკარანტინო ზონები, ყოველი ახლადშესახლებული პატიმარი ექვემდებარება სამედიცინო სქრინინგსა და ტესტირებას. პენიტენციური დაწესებულებების პერსონალს ასევე უტარდება მუდმივი სქრინინგი და ტესტირება. სასამართლო სხდომებში პატიმრები დისტანციურად მონაწილეობენ. დღეისათვის საქართველოს პენიტენციურ დაწესებულებებში კორონავირუსის არც ერთი შემთხვევა არ გამოვლენილა და ყველაფერს ვაკეთებთ, რათა მდგომარეობა ამ ნიშნულზე შევინარჩუნოთ“, – განაცხადა ლორთქიფანიძემ.
