ვაკე-საბურთალოს პოლიციის შენობაში ბიზნესმენ გოგი თოფაძის შვილიშვილის, ლევან თოფაძის დაჭრის საქმეზე ერთ-ერთი თვითმხილველი, ზუკა აბაშიძე გამოიკითხა.
მოწმემ პოლიციის შენობა უკომენტაროდ დატოვა.როგორც მისმა ადვოკატმა, არჩილ შაბაშვილმა ჟურნალისტებთან განაცხადა, ის მისი დაცვის ქვეშ მყოფის ინტერესებიდან გამომდინარე მომხდარის დეტალებზე ვერ ისაუბრებს.
„ჩვენ გამოძიებას მივაწოდეთ ინფორმაცია, ჩემი დაცვის ქვეშ მყოფის ინტერესებიდან გამომდინარე საქმის დეტალებზე ვერ ვისაუბრებ“, – განაცხადა ადვოკატმა.
შეგახსენებთ, რომ თბილისში, საკუთარ სახლში ბიზნესმენ გოგი თოფაძის შვილიშვილი დაჭრეს. შსს-ს ინფორმაციით, გამოძიებით დადგინდა, რომ ბრალდებულმა ბ.ჟ.-მ მიმდინარე წლის 2 აგვისტოს, ურთიერთშელაპარაკების ნიადაგზე, 1998 წელს დაბადებულ ლ.თ.-ს, მისსავე საკუთარ საცხოვრებელ სახლში, ცივი იარაღით სხეულზე რამდენიმე ჭრილობა მიაყენა.
გამოძიება საქართველოს სისხლის სამართლის კოდექსის 117-ე მუხლის 1-ლი ნაწილით მიმდინარეობს, რაც ჯანმრთელობის განზრახ მძიმე დაზიანებას გულისხმობს.
თბილისში ჯანმრთელობის განზრახ მძიმე დაზიანების ბრალდებით ზურაბ ჟვანიას შვილი დააკავეს
