თბილისის მერის, კახა კალაძის შეფასებით, ქართული ოცნება ერთადერთი პარტიაა, რომელსაც 2020 წლის საპარლამენტო არჩევნებზე უმრავლესობით მოსვლა შეუძლია. ამის შესახებ კალაძემ ტელეკომპანია „იმედზე“ სტუმრობისას განაცხადა.
მისივე თქმით, ყველა კანდიდატს საკუთარ ოლქებში მოსახლეობის უმრავლესობის მხარდაჭერა აქვს.
„დიდი ხნის განმავლობაში მიმდინარეობდა მუშაობა, ყველა ოლქში ჩვენ გვყავდა 4-5 კანდიდატი, რომლის გატესტვა მიმდინარეობდა როგორც ერთმანეთთან, ასევე სავარაუდო ოპონენტებთან მიმართებით და დღეს დასახელებული კანდიდატები არიან ის ადამიანები, რომლებსაც საზოგადოების მხრიდან კონკრეტულ ოლქებში აქვთ ყველაზე მეტი მხარდაჭერა. მათ აქვთ ძალიან დიდი რესურსი და შესაძლებლობები, რომ არჩევნებში პირველივე ტურში მოიგონ.
შერჩევის პროცესში ძირითადი ყურადღება ეთმობოდა: პროფესიონალიზმს, პატიოსნებას. არიან გამოცდილი კანდიდატები, რომლებიც სხვადასხვა სახელმწიფო უწყების ხელმძღვანელები იყვნენ, საქმიანობდნენ პარლამენტში და ასევე არიან გუბერნატორები.
მთლიანობაში, ყველა მოთხოვნა და დაკვეთა, რომელიც მოდის საზოგადოების მხრიდან, მაქსიმალურად იყო გათვალისწინებული და დარწმუნებული ვარ, რომ ყველას აქვს რეალური შესაძლებლობა, რომ პირველივე ტურში მოიგონ არჩევნები“, – განაცხადა კახა კალაძემ.
შეგახსენებთ, რომ დღეს „ქართულმა ოცნებამ“ მაჟორიტარი დეპუტატობის კანდიდატები წარადგინა.
