შერიგებისა და სამოქალაქო თანასწორობის საკითხებში ყოფილი სახელმწიფო მინისტრი, პოლიტოლოგი პაატა ზაქარეიშვილი „პრაიმტაიმნიუსთან“ „ნაციონალური მოძრაობის“ მიერ სიის პირველ ნომრად მსახიობისა და მომღერლის, ბუბა კიკაბიძის წარდგენას ეხმაურება.
როგორც ზაქარეიშვილმა განაცხადა, კიკაბიძის სიის პირველ ნომრად წარდგენა ქართველი ხალხის შეურაცხყოფა არის.
„ნაციონალური მოძრაობა“ მხოლოდ პოპულიზმზე ფიქრობს. როცა პარტია ბუბა კიკაბიძის კანდიდატურას აყენებს, გამოდის, „ნაცმოძრაობა“ ქართველებზე ძალიან დაბალი წარმოდგენის არის. ამ პარტიისთვის უფრო მნიშვნელოვანი ფილარმონიაა, ვიდრე საქართველოს პარლამენტი. კიკაბიძეს არაფერი მოეთხოვება, ის პოლიტიკის საერთოდ აზრზე არ არის.
პრობლემა არის არა კიკაბიძეში, არამედ „ნაცმოძრაობაში“. კიკაბიძე პარლამენტში არაფერს გააკეთებს, დარწმუნებული ვარ, სხდომებზეც არ ივლის. ის უკვე მოხუცი კაცია, რა დროს მაგის პოლიტიკაა“,- განაცხადა ზაქარეიშვილმა.
რაც შეეხება „ქართული ოცნების“ საარჩევნო სიას, ექსპერტი აცხადებს, რომ ახალი სახეების გამოჩენით ქართულ პოლიტიკაში არაფერი შეიცვლება.
„არსებითად ახალი არაფერი არ არის არც სიაში და არც პროგრამაში. მხოლოდ ერთგულების მიხედვით არის ხალხი შერჩეული. მომდევნო წლებში არაფერი შეიცვლება“, – განაცხადა ზაქარეიშვილმა.
ინფორმაციისთვის, გუშინ „ქართულმა ოცნებამ“ და „ნაციონალურმა მოძრაობამ“ საარჩევნო სიის შემადგენლობა წარადგინეს.
