რა ასაკიდან იწყება ბავშვების გრიპის ვაქცინაზე აცრა? რატომ არის აუცილებელი, რომ ჩვენი შვილები ავცრათ და რა ღირს ვაქცინა? ამ საკითხზე „პრაიმტაიმნიუსთან“ პედიატრი ინგა მამუჩიშვილი საუბრობს. 

„გრიპის ვირუსი იწყება  ნოემბერ-დეკემბერში. ვინაიდან  წელს კორონავირუსის ინფექციის აღმავალი სტატისტიკა გვაქვს, ამიტომ გასათვალისწინებელია არ მოხდეს თანხვედრა გრიპის სიმპტომებისა და კოვიდ ვირუსის.

იმისთვის, რომ არ გვქონდეს პანიკის საფუძველი, სასურველია, მოსახლეობა აიცრას. განსაკუთრებით კი რისკ-ჯგუფები.

პედიატრის თქმით, ბავშვები 6 თვის ასაკიდან იცრებიან.

„ბავშვები იცრებიან 6 თვის ასაკიდან. ასევე, სასურველია 65 წლის ზემოთ აიცრას მოსახლეობა.

15 ოქტომბრიდან კვლავ ველოდებით ვაქცინას, რომელიც მოიცავს H1N1 და H3N2-ს. ეს ვაქცინები კარგი და ხარისხიანია.

ნიდერლანდების ვაქცინა ხარისხიანია და არანაირ გვერდით მოვლენებს არ იძლევა. აუცილებელია, რომ ბავშვები და რისკ-ჯგუფები აიცრან. რათა გართულებები არ მივიღოთ„,- განმარტავს პედიატრი.

მისივე თქმით, მთავარია ბავშვი ჯანმრთელი აიცრას.

„ვაქცინაციისთვის უკუჩვენებას წარმოადგენს ტემპერატურული რეაქცია და მე მაინც ვურჩევ მშობლებს, თუ ბავშვებს რაიმე რესპირაციული სიმპტომები ექნებათ დაველოდოთ გამოჯანმრთელებას და ისე ავცრათ. ვაქცინაციის შემდეგ 2 კვირაა საჭირო, რომ იმუნიტეტი გამომუშავდეს“. 

თუ ბავშვს ალერგია აქვს?

ვაქცინა ალერგიული არაა, თუმცა  ბავშვები, რომლებიც ძალიან ალერგიულები არიან და ყველაფერზე მკვეთრად გამოხატული ალერგია აქვთ, სასურველია აიცრან ალერგოლოგიის და იმუნოლოგიის ცენტრში მათი მეთვალყურეობის ქვეშ.

რა ღირს გრიპის ვაქცინა? 

ფასიანია, თუმცა მედპერსონალი და რისკ-ჯგუფის ადამიანები უფასოდ აიცრებიან სახელმწიფოს მიერ.

ზოგადად აცრის ფასი 50 ლარიდან იწყება. კერძო კლინიკას კი თავისი ფასები აქვს. – ამბობს „პრაიმტაიმნიუსთან“ საუბრისას პედიატრი ინგა მამუჩიშვილი.