გარდაცვლილი ფეხბურთელის, გიორგი შაქარაშვილის ბიძა მირიან ნიკოლაძე, რომელიც „ჩვენი საქართველო-სოლიდარობის ალიანსის“ პოლიტიკური საბჭოს წევრია, 2020 წლის საპარლამენტო არჩევნებში მონაწილეობის მიღებას გამორიცხავს.
როგორც ნიკოლაძემ „პრაიმტაიმთან“ ინტერვიუში განაცხადა, ის ყოფილი და მოქმედი ხელისუფლების წინააღმდეგ, პარლამენტში შესვლის გარეშე იბრძოლებს.
მირიან ნიკოლაძე: მე ჯერ კიდევ დიდი ხნით ადრე ვიყავი ჩართული, მათ შორის, კონსულტაციების დონეზე პარტიულ საქმიანობაში. შემდგომ პარტიის რეგისტრაციის დროს ოფიციალურად წარმადგინეს და მოგეხსენებათ, მე ახლა ვარ პარტიის პოლიტსაბჭოს წევრი.
რა მაჟორიტარობა, რის მაჟორიტარობა?! მალევე ტრაგედია დაგვატყდა თავს და რა მემაჟორიტარებოდა?! ეს არ მაინტერესებს, საერთოდ არ არის ეს ჩემს ინტერესში. მე არჩევნებში, რა თქმა უნდა, მონაწილეობას არ მივიღებ. ჩემთვის მაჟორიტარობა და მსგავსი რამეები საინტერესო არ არის, ჩემთვის საინტერესოა ზოგადი ამოცანები.
ერთადერთი რამე მაინტერესებს, ამას არ შევარჩენ „ქართულ ოცნებას“, სანამ პირში სული მედგმება – რომ ეს ნაგვები დატოვა ისევ… დღეს რომ ციხეებში უნდა ეყარონ, გალიაში რომ პეჩენიებს უნდა აწვდიდეს მთელი ქვეყანა. აი, ამ ხალხს რომ პასუხი არ მოეთხოვა, ამას „ქართულ ოცნებას“ არ შევარჩენ.
-ბატონო მირიან, რომელი ყოფილი თუ მოქმედი მაღალჩინოსნების დასჯას მოითხოვთ კონკრეტულად?
-საერთოდ ვინ დასაჯეს? თავიანთი მრევლი ჰყავთ 100 ათას კაციანი, ფანატიკოსების ჯგუფი, ნახევარი მათგანი იყო სისხლის სამართლის დამნაშავე და ხმა არავის გაუცია. წინა ცხრაწლიან პერიოდში, როდესაც ეს ხალხი ჩადიოდა სისხლის სამართლის დანაშაულს, შემდგომში მათ პასუხი არავინ გასცა. 20 ათასამდე განცხადებაა საქართველოს გენერალურ პროკურატურაში შესული „ნაციონალური მოძრაობის“ დროს ჩადენილ დანაშაულებთან დაკავშირებით და 100 კაცზე არ არის შედეგი დამდგარი.
-თქვენი მიზანია, რომ პოლიტიკური ველიდან „ქართულ ოცნებასთან“ ერთად, „ნაციონალური მოძრაობაც“ გააქროთ?
-პირადად ჩემი მიზანი ეს არის და პარტიას სხვა უფრო დიდი გეგმებიც აქვს. მე ვეხმარები ჩემს მეგობრებს, ვარ პოლიტიკური საბჭოს წევრი. მათთვის გავაკეთებ იმას, რასაც მთხოვენ და რაშიც დავჭირდები.
-საზოგადოების ნაწილი გაკრიტიკებთ, რადგან მათი აზრით, პოლიტიკაში წასვლისთვის არასასურველი დრო შეარჩიეთ. რა პასუხი გაქვთ აღნიშნულზე?
-რომელი საზოგადოება – ფანატიკოსები არიან. მიშას სურათები რომ უდევთ „ფეისბუქის“ გვერდზე, მეტი არავინ იწყევლება და იგინება. შეხვალთ ნახავთ, მიშას სურათი უდევს ან “ნაციონალის” დროშა აქვს ტანზე შემოხვეული და აქეთ-იქით ოლიმპიური ჩემპიონივით დარბის. რომელ საზოგადოებაზე ლაპარკობთ – ამ მაჯლაჯუნების, ფანატიკოსების ბუდეზე?! მე ანგარიშები უნდა ვაბარო ამ ავადმყოფებს, გინდა გვარამიას და გაბუნიას?!
-გიორგი შაქარაშვილის საქმის გამოძიებასთან დაკავშირებით, როგორი მოლოდინი გაქვთ – დადგება თუ არა ამ საქმეზე ობიექტური შედეგი?
-როგორი მოლოდინიც მაქვს, შედეგიც ისეთი იქნება, რადგან დღემდე ოჯახის მოთხოვნა რაც იყო, ყველაფერი შესრულებულია. იმედი მაქვს, რომ არაფერი შეიცვლება.
ავტორი: ეკატერინე ზარნაძე
