რა მოხდება, თუ პრეზიდენტობის ვადის დასრულების მიუხედავად დონალდ ტრამპს იმპიჩმენტს მაინც გამოუცხადებენ - ეს ამერიკის ისტორიაში პირველად ხდება

დონალდ ტრამპი აშშ-ს ისტორიაში ერთადერთი პრეზიდენტია, რომელსაც წარმომადგენელთა პალატაში იმპიჩმენტი ორჯერ გამოუცხადეს.

კერძოდ, 2019 წლის 18 დეკემბერს აშშ-ის წარმომადგენელთა პალატამ დონალდ ტრამპს იმპიჩმენტი პირველად გამოუცხადა, ხოლო შემდეგ აშშ-ის სენატმა ტრამპი იმპიჩმენტის პროცედურის ფარგლებში წაყენებულ ორივე ბრალდებაში გაამართლა. მაშინ კონგრესმენებმა დონალდ ტრამპს ბრალი სამსახურეობრივი უფლებამოსილების გადამეტებასა და კონგრესის მუშაობისთვის ხელის შეშლაში დასდეს.

ამ თემაზე დეტალურად: როგორ დაიწყო და რატომ ვერ მოახერხეს ტრამპის გადაყენება – იმპიჩმენტის ქრონოლოგია

ამჯერად კი დონალდ ტრამპს 6 იანვარს კაპიტოლიუმში განვითარებული მოვლენების გამო, ამბოხისკენ წაქეზებაში ადანაშაულებენ. ბრალდების მხარეს 9 დემოკრატი კონგრესმენი წარმოადგენს.

აშშ-ის სენატმა ტრამპის იმპიჩმენტის პროცესი კონსტიტუციურად ცნო. ეს ნიშნავს იმას, რომ ექსპრეზიდენტისთვის წაყენებულ ბრალთან დაკავშირებით იმპიჩმენტის პროცესი სენატში ოთხშაბათს განახლდება და სავარაუდოდ რამდენიმე დღეს გაგრძელდება.

ეს აშშ-სთვის უპრეცედენტო შემთხვევაა, როცა სენატი თანამდებობიდან გადამდგარი პრეზიდენტის იმპიჩმენტს განიხილავს.

|როგორ მიმდინარეობს სენატში სასამართლო პროცესი

სენატში მიმდინარე სასამართლო პროცესი მთლიანად პოლიტიკური ხასიათისაა. პროცესის დასასრულს სენატის ორივე პალატას (რესპუბლიკელებსა და დემოკრატებს) ხმის მიცემის შესაძლებლობა მიეცემა.

დონალდ ტრამპის დამნაშავედ ცნობისთვის საჭირო იქნება ხმების ორი მესამედი, რაც იმას ნიშნავს, რომ საჭირო იქნება სულ მცირე 17 რესპუბლიკელის ხმა.

იმ შემთხვევაში, თუ სენატი დონალდ ტრამპს დამნაშავედ ცნობს, მომდევნო ნაბიჯი იქნება ყოფილი პრეზიდენტისთვის ნებისმიერი თანამდებობის დაკავების აკრძალვა, რისთვისაც სენატის უმრავლესობის თანხმობა საკმარისია.

|თარიღები – როდის რა მოხდება

სამშაბათს, 8 თებერვალს სენატში უკვე გაიმართა პირველი პროცესი, სადაც აშშ-ის სენატმა ტრამპის იმპიჩმენტის პროცესი კონსტიტუციურად ცნო. პროცესის კონსტიტუციურობის დადგენა საჭირო იყო, რადგან დონალდ ტრამპს აღარ უჭირავს თანამდებობა.

9 თებერვალს სენატის ორივე პალატას ცალ-ცალკე 16 საათი მიეცა, რათა შესაბამისი მტკიცებულებები წარმოედგინა.

ამის შემდეგ მათ შეეძლებათ არჩევანი გააკეთონ დებატების გამართვასა და მოწმეების წარმოდგენას შორის.

ჯერჯერობით არ არის ცნობილი რამდენ ხანს გაგრძელდება სამართალწარმოება, თუმცა დემოკრატებს უნდათ რომ ეს ყველაფერი მალე მოხდეს, რადგან მთლიანი ყურადღება აშშ-ს ახალ პრეზიდენტს, ჯო ბაიდენს დაუთმონ.

|როგორ იცავს ტრამპი თავს

დონალდ ტრამპის ადვოკატებმა, წაყენებული ბრალდება უარყვეს. ისინი ამტკიცებენ, რომ მოქალაქეები 6 იანვარს აშშ-ს კაპიტოლიუმში თავისი სურვილით შეიჭრნენ და ტრამპს ისინი არ წაუქეზებია.

„ტრამპის განცხადებების დახასიათება როგორც „აჯანყების წაქეზება“ ნიშნავს, რომ იგნორირებულია მისი მოწოდებები, რომლითაც ის მოქალაქეებს ეუბნებოდა მშვიდობიანად დაეტოვებინათ კაპიტოლიუმის შენობა“,- განაცხადეს ადვოკატებმა.

მათივე განცხადებით, FBI-ის დოკუმენტები ცხადყობს იმას, რომ აჯანყება წინასწარ იყო დაგეგმილი.

ასევე, ისინი მიიჩნევენ, რომ ტრამპის იმპიჩმენტის პროცესი არაკონსტიტუციურია, რადგან მან აღარ უკავია თანამდებობა.

ადვოკატებმა იმპიჩმენტის პროცესს „პოლიტიკურ თეატრი“ და „თავხედური პოლიტიკური აქტი“ უწოდეს, რომელიც მიზნად „პოლიტიკური ოპონენტისა და უმცირესობის პარტიის გაჩუმებას“ ისახავს.