თბილისის მერმა აჭარის ტელევიზიაში სტუმრობისას განაცხადა, რომ ოპოზიციური პარტიები დღეს იმ სცენარის მიხედვით მოქმედებენ, რომელზეც მმართველმა პარტიამ მოსახლეობა არჩევნებამდე რამდენიმე დღით ადრე გააფრთხილა.
კახა კალაძის განმარტებით, ის ბრალდებები, რომელსაც ოპოზიციური პარტიები ხელისუფლებას უყენებენ აბსურდია და ეს ყველაფერი რევოლუციური სცენარის ნაწილია.
„არჩევნები ჩატარდა თავისუფალ გარემოში, სადაც ყველა პოლიტიკურ პარტიას ჰქონდა შესაძლებლობა კამპანიის დროს ეწარმოებინა შეხვედრები, წარედგინა საზოგადოებისთვის საკუთარი ხედვა და ა.შ. არჩევნების დღეს. ამის მიუხედავად, გარკვეულ ოლქებში იყო დაპირისპირების და პროვოკაციების მოწყობის მცდელობა. ჩვენ რამდენიმე დღით ადრე ვსაუბრობდით, რომ რადიკალური ოპოზიცია ცდილობდა და ჰქონდათ გეგმა კონკრეტულ ოლქებში მოხდებოდა პროვოკაციების მოწყობა. სამწუხაროდ ასეც მოხდა, თუმცა ჩვენ მაქსიმალურად გავაკეთეთ ყველაფერი, რომ ამ დაპირისპირებაში არ შევსულიყავით და შინაგან საქმეთა სამინისტრომ დროულად განმუხტა ის რამდენიმე ეპიზოდი, რომელიც კონკრეტულ ოლქებში იყო. ამ ყველაფრის მიუხედავად, არჩევნების ჩატარებას ძალიან მაღალი შეფასება მოყვა. იმ რადიკალური ოპოზიციის პარტიების წარმომადგენლები დღეს აბსურდულ განცხადებებს აკეთებენ და ეს ყველაფერი არის იმ გეგმის ნაწილი, რაზეც ჩვენ ვსაუბრობდით, ანუ რევოლუციური სცენარის ნაწილი“, – განაცხადა კახა კალაძემ ვახო ხუზმიაშვილის გადაცემა „თავისუფალ სივრცეში“.
