„ახლა ვიმყოფებით სოფელ ნაკიეთთან, სადაც მდინარემ გზის ასმეტრიანი მონაკვეთი სრულად გაანადგურა, თუმცა უკვე მოეწყო შემოვლითი გზა, რამაც საშუალება მოგვეცა გავაგრძელოთ სტიქიის სალიკვიდაციო სამუშაოები“, – ამის შესახებ რეგიონული განვითარებისა და ინფრასტრუქტურის მინისტრის პირველმა მოადგილემ, საავტომობილო გზების დეპარტამენტის თავმჯდომარემ ირაკლი ქარსელაძემ განაცხადა.
მისი თქმით, ამ დროისთვის იდენტიფიცირებულია 8 მონაკვეთი, სადაც მთლიანად ჩაწყვეტილია გზა .
„12 ერთეული ტექნიკა – ექსკავატორები, ბულდოზერები, თვითმსვლელები უკვე მობილიზებულია, ასევე აქ არიან მაღალი კვალიფიკაციის, გამოცდილი ოპერატორები და შეზღუდული რელიეფიდან გამომდინარე, მაქსიმალურად ვცდილობთ მოკლე პერიოდში მოხდეს მონაკვეთების აღდგენა. ჯერჯერობით რთულია ზარალის ოდენობაზე საუბარი, პირველ რიგში, ჩვენი მიზანია მოვახდინოთ სტიქიის ლიკვიდაცია, რასაც შემდგომში მოჰყვება აუცილებელი სამუშაოები. არსებული სურათიდან გამომდინარე, შესაძლოა დამატებითი ტექნიკის მობილიზება დაგვჭირდეს, საუბარია კიდევ 5 ერთეულ მძიმე ტექნიკაზე, რაც რეგიონში გაგვაჩნია. სტიქია ძალიან ძლიერია და ცუდია ის, რომ ეს არ ხდება ერთ კონკრეტულ ლოკაციაზე, დაზიანებულია გზის სხვადასხვა მონაკვეთი და შესაბამისად, აღდგენასაც განსხვავებული დრო დასჭირდება,“ – აღნიშნა ირაკლი ქარსელაძემ.
ონის მუნიციპალიტეტის მოსახლეობას წყალი ავარიულ რეჟიმში მიეწოდება და თუ სტიქია არ განმეორდა, წყალმომარაგების დაზიანებული ინფრასტრუქტურის აღდგენა ოპერატიულად დაიწყება.
