მთავრობას ჩინური ვაქცინის შემოტანისათვის არასწორად აკრიტიკებდით, – ამის შესახებ სოციალურ ქსელში „ნაციონალური მოძრაობის” წევრი რომან გოცირიძე წერს.
რომან გოცირიძის თქმით, ვაქცინაციის პროცესში მთავრობის შეცდომაა, რომ მან ევროპული ვაქცინების შემოტანა ვერ შეძლო.
„ას რამეს გასწავლით ამ მთავრობის უუნარობის, უსუსურობისა და უნიათობის საჩვენებლად და აკრიტიკეთ რამდენიც გინდათ, ჩინური ვაქცინის შემოტანისათვის კი არასწორად აკრიტიკებდით. სწორედ ამიტომ გადავეფარე ამ კრიტიკას. ახლა ყველა კმაყოფილია აცრების გაფართოებით. მოკრიტიკეებიც დადუმდნენ.
საჭიროა რაც შეიძლება ბევრი აცრის პუნქტის გახსნა, მათ შორის ცოცხალი რიგის მიხედვით, ყოველგვარი წინასწარი ჩაწერის გარეშე, როგორც ეს ბევრ ქვეყანაშია მიღებული. უნდა მოეწყოს დიდი დარბაზები ( კარვებიც, ღია სივრცეში, მსგავსად ბათუმში შარშან გახსნილისა). სასწრაფოდ უნდა იქნას ათვისებული ის მარაგები, რაც გვაქვს, თორემ დროში გაწელილ პროცესს კარგი შედეგი რომ არ ექნება, ყველამ კარგად ვიცით.
p.s. რაც ზემოთ დავწერე, ეს ვერ ამართლებს მთავრობის უუნარობას, რომელმაც ვერ შეძლო აღიარებული ევროპული და ამერიკული ვაქცინებით ქვეყნის მოქალაქეების უზრუნველყოფა.”, – წერს რომან გოცირიძე.
