რუსეთის თავდაცვის სამინისტროს ინფორმაციით, რუსული სამშვიდობო ძალების კონტინგენტი ქალაქ სტეფანაკერტში შევიდა.
„12 ნოემბერს, რუსეთის სამშვიდობო ძალების კონტინგენტის მოწინავე დანაყოფები მთიანი ყარაბაღის ტერიტორიაზე ცეცხლის შეწყვეტის რეჟიმის შესრულების კონტროლს შეუდგნენ. ცეცხლის შეწყვეტის რეჟიმი ყარაბაღში შეხების ხაზის გასწვრივ სრულად დაცულია“, – განაცხადა რუსეთის თავდაცვის სამინისტროს წარმომადგენელმა, იგორ კონაშენკოვმა.
შეგახსენებთ, რომ სომხეთის პრემიერ-მინისტრმა, ნიკოლ ფაშინიანმა რუსეთისა და აზერბაიჯანის პრეზიდენტებთან ხელი მოაწერა შეთანხმებას, რომელიც მთიან ყარაბაღში საომარი მოქმედებების შეწყვეტას ითვალისწინებს.
ფაშინიანის ამ განცხადებას ერევანში პროტესტი მოჰყვა. მოქალაქეების ნაწილი მთავრობის სახლში შეიჭრა.
ასევე, მომიტინგეები ფიზიკურად გაუსწორდნენ სომხეთის პარლამენტის თავმჯდომარეს არარატ მირზოიანს.
კრემლი აქვეყნებს პუტინის, ფაშინიანისა და ალიევის შეთანხმებას ყარაბაღის შესახებ, რომლის მიხედვითაც მხარეები წყვეტენ საბრძოლო მოქმედებებს, ჩერდებიან დაკავებულ პოზიციებზე და გაცვლიან ტყვეებს. შეთანხმების თანახმად, სომხეთმა ლაჩინის, აღდამის და კელბაჯარის რეგიონები აზერბაიჯანს უნდა დაუბრუნოს. გარდა ამისა, მთიან ყარაბაღში რუსი სამშვიდობოები განთავსდებიან.
დოკუმენტი 9 პუნქტისგან შედგება და ერთ-ერთი პუნქტის თანახმად ლაჩინის დერეფნის გასწვრივ, რუსეთის სამშვიდობო კონტინგენტი 1960 მცირე ზომის იარაღით აღჭურვილი სამხედრო მოსამსახურით, 90 ჯავშანტექნიკითა და 380 ერთეული საავტომობილო და სპეციალური ტექნიკით განლაგდება.
ასევე დაგაინტერესებთ:
