“სააპელაციო სასამართლომ განაგრძო „ქართული ოცნების“ პოლიტიკური დღის წესრიგით სვლა და ჩვენი საჩივარი დაუშვებლად ცნო”, – ამის შესახებ ნიკა მელიას ადვოკატმა, ბექა ბასილაიამ განაცხადა, რითაც სააპელაციო სასამართლოს გადაწყვეტილებას გამოეხმაურა.
„როგორც მოსალოდნელი იყო, სააპელაციო სასამართლომ განაგრძო „ქართული ოცნების“ პოლიტიკური დღის წესრიგით სვლა და ჩვენი საჩივარი დაუშვებლად ცნო, თითქოს კანონი არ აძლევდა საშუალებას, დაეკმაყოფილებინა ჩვენი შუამდგომლობა. ჩნდება მარტივი კითხვა: სამი დღე რატომ დასჭირდათ? ეს სამი დღე მათ დასჭირდათ, რათა „ქართულ ოცნებას“ თავისი პოლიტიკური ნება ჩამოეყალიბებინა, ელოდებოდნენ საერთაშორისო გამოხმაურებებს, ელოდებოდნენ ქვეყნის შიგნით დაძრულ პროცესებს და ამ ეტაპისთვის პოლიტიკურად მიზანშეწონილად მიიჩნიეს, რომ პატიმრობა არ შეიცვალოს.
ამ გადაწყვეტილების იურიდიულ მხარეს ჩვენთვის მნიშვნელობა არ აქვს ისევე, როგორც გადამწყვეტი მნიშვნელობა არ ჰქონდა მოსამართლე ჩახნაშვილისთვის წარდგენილ არაერთ სამართლებრივ არგუმენტს, თუ რატომ არ უნდა შეფარდებოდა ნიკა მელიას პატიმრობა. ყველა ბერკეტს გამოვიყენებთ, რაც შეიძლება იყოს კანონით და კონსტიტუციით მონიჭებული“, – განაცხადა ბექა ბასილაიამ.
შეგახსენებთ, თბილისის სააპელაციო სასამართლომ „ერთიანი ნაციონალური მოძრაობის“ თავმჯდომარის, ნიკა მელიას ადვოკატების საჩივარი დაუშვებლად ცნო.
