იქნებიან თუ არა „ქართული ოცნების“ პროპორციულ სიაში მმართველი პარტიის ყოფილი და მოქმედი მაღალჩინოსნები მამუკა ბახტაძე და თეა წულუკიანი?!
როგორც „პრაიმტაიმნიუსისთვის“ გახადა ცნობილი, „ქართული ოცნება“ მათ კანდიდატურებს აქტიურად განიხილავს. როგორც სააგენტოსთან კონფიდენციალურმა წყარომ განაცხადა, ბახტაძის საკითხი, ფაქტობრივად, გადაწყვეტილია და მას „ქართლი ოცნების“ სიაში ვიხილავთ.
რაც შეეხება წულუკიანს, როგორც კავკასიის საკითხებში ექსპერტმა მამუკა არეშიძემ „პრაიტაიმნიუსთან“ განაცხადა, წულუკიანს, სავარაუდოდ, მმართველი პარტია ვიცე-პრემიერის თანამდებობაზე დატოვებს.
“სარწმუნოა, რომ მამუკა ბახტაძე „ქართული ოცნების“ პროპორციულ სიაში იქნება. „ქართულ ოცნებაში“ ამ საკითხზე საუბრები ნამდვილად მიმდინარეობს. რაც შეეხება თეა წულუკიანს, სავარაუდოდ, მის დატოვებას მაინც ვიცე-პრემიერის თანამდებობაზე ამჯობინებენ – არა იმიტომ, რომ წულუკიანი დეპუტატობისთვის ცუდი კანდიდატურაა.
მმართველ პარტიაში ახლა სავარაუდო კანდიდატების ფართო განხილვა მიმდინარეობს, განსაკუთრებით იმ მიღებული გადაწყვეტილების ფონზე, რაც ქალთა კორპუსის გაძლიერებას გულისხმობს. ასე, რომ ჯერჯერობით, „ქართული ოცნების“ პროპორციული სიის შემადგენლობაზე საუბარი მაინც ნაადრევია.
სიაში, ბუნებრივია, სადეპუტატო კორპუსიდანაც იქნებიან, მაგალითად, პროპორციულ სიაში იქნება მამუკა მდინარაძე, ირაკლი კობახიძე, გია ვოლსკი, არჩილ თალაკვაძე, კომიტეტის თავმჯდომარეები, რომან კაკულია და სხვები“,- განაცხადა არეშიძემ.
ინფორმაციისთვის, რამდენიმე დღის წინ „ქართულმა ოცნებამ“ მაჟორიტარობის კანდიდატები წარადგინა და წინასაარჩევნო კამპანია ოფიციალურად გახსნილად გამოაცხადა.
იმ შემთხვევაში, თუ კორონავირუსის პანდემიამ დღის წესრიგი არ შეცვალა, საპარლამენტო არჩევნები 2020 წლის 31 ოქტომბერს გაიმართება. არჩევნების შემდეგ, პარლამენტი 30 მაჟორიტარით და 120 – პროპორციულ სიაში შესული შესული დეპუტატით დაკომპლექტდება.
ავტორი: ეკატერინე ზარნაძე
