ამ ეტაპზე ხელისუფლება „მთავარი არხის“ ერთ-ერთ დამფუძნებელს, გიორგი რურუას საპატიმროდან არ გაათავისუფლებს, რადგან რურუას გამოშვება ხელისუფლებისთვის წამგებიანი იქნება. ამის შესახებ „პრაიმტაიმთან“ პოლიტიკის ექსპერტმა ვახტანგ ძაბირაძემ განაცხადა.
ექსპერტის თქმით, რურუას გათავისუფლების საკითხი პოლიტიკური პიარის სიბრტყეში გადავიდა და პოლიტიკური დივიდენდების მოპოვების სახე მიიღო.
„გიორგი რურუას გათავისუფლება უკვე პოლიტიკური პიარის სიბრტყეში გადავიდა და პოლიტიკური დივიდენდების მოპოვების შეფერილობა მიიღო. როგორც ხელისუფლება, ისე ოპოზიცია უფრო მეტად ცდილობს, რომ ამ პროცესიდან პოლიტიკური კაპიტალი გამოადნოს.
ამ ეტაპზე ხელისუფლებისთვის რურუას გათავისუფლება წამგებიანია, რადგან რურუას გამოშვება საზოგადოებისა და ოპოზიციის მიერ აღქმული იქნება – რომ ხელისუფლებამ ოპოზიციის ზეწოლას ვერ გაუძლო და ამიტომ იძულებული გახდა, რურუა გაეთავისუფლებინა.
დარწმუნებული ვარ, ამ ეტაპზე ხელისუფლება რურუას არ გამოუშვებს. მას აქვს საკმარისი რაოდენობა ხმების, რომ საკონსტიტუციო ცვლილებები განახორციელოს და უფრო მომგებიან პოზიციაში იყოს“,- განაცხადა ძაბირაძემ.
კითხვაზე, არის თუ არა სწორი პოლიტიკური სტრატეგია ის, რომ„ნაციონალური მოძრაობისა“ და „ევროპული საქართველოს“ საკონსტიტუციო ცვლილებების კენჭისყრაში მონაწილეობას არ იღებენ. ძაბირაძე გვპასუხობს, რომ ოპოზიციური პარტიები შეცდომას უშვებენ.
„ამ პარტიების სტრატეგიას სწორად არ ვაფასებ. ოპოზიციას საკონსტიტუციო ცვლილებების საკითხი რურუასთან არ უნდა მიება. მათ კარგად უნდა გამოეყენებინათ ის მოცემულობა, რომ ხელისუფლებამ ირაკლი ოქრუაშვილი და გიგი უგულავა გაათავისუფლა“,- განაცხადა ძაბირაძემ.
“ნაციონალურ მოძრაობსა” და “ევროპულ საქართველოს” საკონსტიტუციო ცვლილებების განხილვაში პირველ და მეორე მოსმენაში მონაწილეობა არ მიუღიათ. როგორც პარტიის ლიდერები აცახდებენ, ვიდრე გიორგი რურუა ციხიდან არ გათავისუფლდება, საკონსტიტუციო ცვლილებების კენჭისყრაში მონაწილეობას ბოიკოს უცხადებენ.
„მთავარი არხის“ ერთ-ერთი დამფუძნებელი გიორგი რურუა სამართალდამცველებმა 18 ნოემბერს, სსკ-ის 236-ე მუხლის მე-3 და მე-4 ნაწილებით გათვალისწინებული დანაშაულისთვის დააკავეს. აღნიშნული მუხლი ცეცხლსასროლი იარაღის მართლსაწინააღმდეგო შეძენა-შენახვა-ტარებას გულისხმობს.
ავტორი: ეკატერინე ზარნაძე
