„ნაციონალური მოძრაობის“ მირ საქართველოს ყოფილი პრეზიდენტის, მიხეილ სააკაშვილის ციხიდან დახსნის კამპანიას, შესაძლოა, პარტიის გაყოფა ახლდეს თან, რაც პოლიტიკის ექსპერტის, ვახტანგ ძაბირაძის განცხადებით, გაზაფხულზე გაფორმდება.
“პრაიმტაიმთან” ექსპერტის შეფასებით, ამავე პერიოდში „ნაციონალურ მოძრაობას“ ოფიციალურად ჩამოშორდება ჯერ კიდევ მოქმედი თავმჯდომარე ნიკა მელია, რომელიც ამჟამად დამოუკიდებელი პოლიტიკური ფიგურის როლს თამაშობს.
პარტიის მომავალი თავმჯდომარის პოსტზე ლიდერთა შორის პოლიტიკური ქულების გადათამაშებაც მალევე დაიწყება და მომავალი თავმჯდომარის პოსტს, ექსპერტის ინფორმაციით, გადაიბარებს ლევან ხაბეიშვილი, რომელისთვისაც პრიორიტეტი ქუჩის პროტესტია.
„ნაციონალური მოძრაობა“ გაზაფხულზე გაიყოფა. ჩანს, რომ პარტიაში დაძაბული ვითარებაა. რა პრობლემა აქვთ ნიკა მელიასთან ნაციონალებს? მან დიდი მიტინგი დაშალა, ის აღიქმებოდა, როგორც ქუჩის საპროტესტო ქუჩის ლიდერი. თუ მელია ახლა ქუჩის პროტესტზე უარს ამბობს, მიხეილ სააკაშვილი ითხოვს, რომ ქუჩა უნდა გააქტიურდეს, რაც ბუნებრივია, წინააღმდეგობაში მოდის ერთმანეთთან.
პარტიის ახალი თავმჯდომარეების ცვლილება სააკაშვილის კურთხევის გარეშე რომ ვერ მოხდება, ეს ნათელია. სააკაშვილი თავად პარტიის თავმჯდომარე ვერ იქნება, ამიტომ დიდი ალბათობით, ახალი პარტიის თავმჯდომარედ ლევან ხაბეიშვილი იქნება არჩეული.
ხაბეიშვილი ის ტიპაჟია, რომლის პრიორიტეტი არის ქუჩა. განხილული იქნება ნიკა გვარამიასა და ხატია დეკანოიძის კანდიდატურებიც, თუმცა სააკაშვილისთვის ყველაზე მისაღები ლევან ხაბეიშვილია “,- განაცხადა ძაბირაძემ.
აღსანიშნავია, რომ „ნაციონალურ მოძრაობაში“ პოლიტიკური დაძაბულობის ფონზე, საქართველოს ყოფილი პრეზიდენტი მიხეილ სააკაშვილი სასჯელს ქართულ ციხეში იხდის. ამჟამად ის მკურნალობას გორის სამხედრო ჰოსპიტალში გადის.
მიხეილ სააკაშვილი ცნობილი არის დამნაშავედ ვალერი გელაშვილის ცემისა და სანდრო გირგვლიანის სისხლის სამართლის საქმეებზე. მას სასჯელის ზომად განსაზღვრული აქვს თავისუფლების აღკვეთა 6 წლის ვადით. აღნიშნულ საქმეებზე სასამართლოს მიერ გამოტანილი გადაწყვეტილებები საბოლოოა და არ საჩივრდება.
ავტორი: ეკატერინე ზარნაძე
