გასაკვირი არაფერია იმაში, რომ საერთაშორისო რეგულარულ საჰაერო მიმოსვლაზე შეზღუდვა 30 სექტემბრის ჩათვლით გახანგრძლივდა, – ამის შესახებ დაავადებათა კონტროლის ეროვნული ცენტრის ხელმძღვანელმა, ამირან გამყრელიძემ განაცხადა.
მისივე თქმით, მთლიანად ევროპაში ფრენის მობილობა დაახლოებით 60-70 პროცენტით არის შემცირებული.
„ამიტომ ამაში არაფერი გასაკვირი არ არის. ჩვენ ჯერჯერობით ვმართავთ სიტუაციას, ქვეყანაში ეპიდსიტუაცია მართვადია და ეს სწორედ შედეგია იმ ღონისძიებების, რაც ქვეყანამ განახორციელა ბოლო თვეების განმავლობაში, მათ შორის ერთ-ერთია სწორედ ფრენების მაქსიმალურად შემცირება. მესმის, შესაძლებელია, ეს ადამიანებისთვის გარკვეული დისკომფორტია, მაგრამ საჭიროა, რათა თავიდან ავიცილოთ ქვვეყანაში ინფექციის ფართომასშტაბიანი გავრცელება. ხედავთ, რომ შემთხვევები ყოველდღიურად ოდნავ მომატებული გვაქვს. 10-15-13 შემთხვევა არაფერია, ეს იყო პროგნოზირებადი, რომ შემსუბუქების პოლიტიკის დროს, შესაძლებელი იყო შემთხვევების ზრდა. ეს შემთხვევები ჯანდაცვის სექტორის მიერ, საკმაოდ კარგად იმართება, მაგრამ უცბად ყველაფრის გახსნა არ შეიძლება. ამიტომ ვფიქრობ, საკმაოდ სწორი გადაწყვეტილებაა, რომ ასე ვთქვათ ფართომასშტაბიანი გახსნა საზღვრებისა 30 სექტემბრამდე გადავადდა“, – განაცხადა ამირან გამყრელიძემ.
