„ქართული მარშის“ ლიდერი, სანდრო ბრეგაძე ვიდეომიმართვას ავრცელებს, სადაც ცოტა ხნის წინ გამოქვეყნებულ ჩანაწერს ეხმაურება.
როგორც ბრეგაძე ამბობს, რუს დეპუტატთან მას საუბარი მხოლოდ ბიზნესზე ჰქონდა.
„სულ რამდენიმე წუთის წინ გამოქვეყნდა ჩანაწერი სენატორ იგორ მოროზოვთან, სადაც ეს ადამიანი მესაუბრება იმის თაობაზე, ხომ არ ვიცი საქართველოში ვინმე, ვისაც შეუძლია, რომ დახმარება გაუწიოს პროპან-ბუტანის ბიზნესს. მე ამ საუბარში ვეუბნები რომ მყავს მეგობრები და მოვიკითხავ ამის თაობაზე. მე ბევრი უცხოელი მეგობარი მყავს და ხშირად ვსაუბრობთ ხოლმე.
უკრაინაში ხდება ჩემი ჩანაწერების თავმოყრა, მონტაჟი და გარკვეულ საიტებზე ატვირთვა. ალბათ, უკრაინიდან ვინ ახდენს ამ ყველაფერს, დღესავით არის ცნობილი. გაფრთხილება იყო, რომ თუ არ შევწყვეტთ აქტივობას, პირადი ცხოვრების კადრებს გამოვაქვეყნებთო. მე მოგიწოდებთ, რომ გამოაქვეყნოთ ჩემი პირადი ცხოვრების კადრები. დარწმუნებული ვარ, მასში არაფერი იქნება, რაც ჩემს დისკრედიტაციას გამოიწვევს“,- ამბობს სანდრო ბრეგაძე.
მისივე თქმით, ამის შემდეგ რა ჩანაწერიც გამოქვეყნდება, არცერთი არ იქნება ნამდვილი.
„მომავალში რა ჩანაწერიც უნდა გამოქვეყნდეს ჩემთან დაკავშირებით, ეს იქნება ფალსიფიკაცია და უკანონოდ გაკეთებული ჩანაწერი. ეს არის ტოტალური მოსმენა, მგონია უკვე თანამგზავრიდანაც გვისმენენ ჩვენ“,- ამბობს სანდრო ბრეგაძე.
იხილეთ სანდრო ბრეგაძის გავრცელებული ვიდეო:
ასევე, ნახეთ დეტალურად: სანდრო ბრეგაძესთან დაკავშირებით სკანდალური ჩანაწერი ვრცელდება.
