საფრანგეთის ელჩმა, დიეგო კოლასმა სამეგრელოში სამდღიანი ვიზიტი დაასრულა. ვიზიტის ფარგლებში კოლასი სამეგრელო ზემო-სვანეთის სახელმწიფო რწმუნებულს ალექსანდრე მოწერელიას და სხვა ოფიციალურ პირებს შეხვდა.
ვიზიტის ბოლო დღე ელჩმა მარტვილში, სახელმწიფო რწმუნებულთან ერთად დადიანების სალხინოს რეზიდენციასა და მარტვილის საკათედრო ტაძარში გაატარა.
,,მოხარული ვარ, რომ ვიმყოფები აქ, ეს არის სტუმართმოყვარე სამეგრელოში ჩემი ვიზიტის ბოლო დღე. ჩვენ გვქონდა ძალიან ნაყოფიერი ვიზიტი, მრავალი მიზეზის გამო. განვიხილეთ ისეთი საკითხები როგორიცაა ენერგეტიკა, სოფლის მეურნეობა, განსაკუთრებული საჭიროების მქონე პირების დახმარება, ტურისტული პოტენციალის განვითარების საკითხები და ამ სფეროებში თანამშრომლობა. ღრმად ვართ დარწმუნებული, რომ ძლიერი ისტორიის საფუძველზე, ჩვენ ავაშენებთ ძალიან ძლიერ მომავალს.
ჩვენ შევხვდით ადგილობრივ მოსახლებას, გავეცანით სხვადასხვა ადგილებს, მადლობას გამოვხატავ სამეგრელო-ზემო სვანეთის სახელმწიფო რწმუნებულის მიმართ გაწეული მასპინძლობისთვის“ – განაცხადა ელჩმა დიეგო კოლასმა ვიზიტის დასასრულს.
სტუმრებს მარტვილის მუნიციპალიტეტის მერმა ალექსანდრე გრიგალავამ და ჭყონიდელმა ეპისკოპოსმა მეუფე გრიგოლ კაციამ უმასპინძლეს.
