კორონავირუსის ეპიდემიის მეორე ტალღის ფონზე, თვითიზოლაციის რეჟიმი საფრანგეთში 30 ოქტომბრიდან გამოცხადდება. ამის შესახებ ქვეყნის პრეზიდენტმა ემანუელ მაკრონმა განაცხადა სპეციალურ ტელემიმართვაში.
„მივიღე გადაწყვეტილება, რომ პარასკევიდან ამოქმედდეს თვითიზოლაციის რეჟიმი, რომელმაც ვირუსი შეაჩერა“ – თქვა მაკრონმა და განმარტა, რომ კარანტინი იმოქმედებს ქვეყნის მთელ ტერიტორიაზე და ის 1 დეკემბრამდე გაგრძელდება.
საფრანგეთში პირველი კარანტინი მარტში შემოიღეს და ის 2 თვის განმავლობაში გაგრძელდა.
ეპიდემიის დაწყებიდან ამ დრომდე საფრანგეთში კორონავირუსის 1,2 მილიონი შემთხვევა დადასტურდა. გარდაიცვალა 35 ათასზე მეტი ადამიანი.
ინფიცირების მორიგი ანტირეკორდი 25 ოქტომბერს დაფიქსირდა, როცა 24 საათში 52 ათასი ადამიანი დაინფიცირდა.
ცნობისთვის, ცოტა ხნის წინ გერმანიის კანცლერმა ანგელა მერკელმაც განაცხადა, რომ გერმანიაში კარანტინის რეჟიმი 2 ნოემბრიდან ამოქმედდება და თვის ბოლომდე გასტანს.
