თბილისის საქალაქო სასამართლომ საქართველოს ტერიტორიების საწინააღმდეგოდ ჩადენილ ქმედებებში ბრალდებულებს, ივერი მელაშვილსა და ნატალია ილიჩოვას აღკვეთის ღონისძიების სახით პატიმრობა შეუფარდა.
გადაწყვეტილება მოსამართლე დავით კურტანიძემ ცოტა ხნის წინ გამოაცხადა.
დღევანდელ სასამართლო პროცესზე ბრალდების მხარე დაკავებულების მიმართ პატიმრობის გამოყენებას ითხოვდა.
ბრალდების შუამდგომლობას არ დაეთანხმა დაცვის მხარე და განაცხადა, რომ პროკურატურის შუამდგომლობა აბსტრაქტულია, ბრალდებულების მხრიდან დანაშაულის ჩადენის, მიმალვისა და მოწმეებზე ზემოქმედების საფრთხეებთან დაკავშირებით.
ივერი მელაშვილის ადვოკატმა ედუარდ მარიკაშვილმა მისი დაცვის ქვეშ მყოფის აღკვეთის გარეშე დატოვების შუამდგომლობა დააყენა.
რაც შეეხება ნატალია ილიჩოვას, მისმა ადვოკატმა სულხან კომახიძემ დაკავებულის 20 000-ლარიანი გირაოს სანაცვლოდ გათავისუფლების შუამდგომლობა დააყენა.
17 აგვისტოს საქართველოს გენერალურ პროკურატურაში გამოძიება დაიწყო სისხლის სამართლის საქმეზე, უცხო ქვეყნისთვის საქართველოს ტერიტორიის ნაწილის გადაცემისაკენ მიმართული მოქმედების განხორციელების ფაქტზე.
დაგაინტერესებთ: ექსპერტის პირველი კომენტარი, რომელმაც დავით გარეჯის საქმეზე დასკვნა მოამზადა
