ყირგიზეთ-ტაჯიკეთს შორის, ბატკენის რაიონში, სასაზღვრო კონფლიქტი 28 აპრილს დაიწყო და რამდენიმე დღის განმავლობაში მიმდინარეობდა.
|რამ გამოიწვია კონფლიქტი
საბჭოთა კავშირის დაშლის შემდეგ, შუა აზიაში საზღვრების ბევრი მონაკვეთი სადავო გახდა. ტაჯიკეთსა და ყირგიზეთს შორის მდებარე საზღვარიც უკვე 30 წელზე მეტია დაპირისპირების მთავარი მიზეზია.
BBC-ის ცნობით, საზღვართან მდებარე სოფლების მცხოვრებნი ერთმანეთს მას შემდეგ დაუპირისპირდნენ, რაც ერთ-ერთმა მხარემ წყლის გამანაწილებელ პუნქტთან ვიდეოკამერის დამონტაჟება სცადა. წყალსაცავიდან წყალს ორივე ქვეყანა დადგენილი კვოტების შესაბამისად იყენებს.
მოგვიანებით კონფლიქტი გამწვავდა.
|მხარეები ერთმანეთს ადანაშაულებენ
ტაჯიკეთის სახელმწიფო უსაფრთხოების კომიტეტი ყირგიზეთის შეიარაღებულ ძალებს წყალგამანაწილებელ პუნქტთან მესაზღვრეებისთვის ცეცხლის გახსნაში ადანაშაულებდა.
ტაჯიკური მხარე კი კონფლიქტის გაღვივებაში ბრალს ყირგიზეთს სდებდა.
29 აპრილს საღამოსთვის, ყირგიზეთი და ტაჯიკეთი ჯარების გაყვანასა და ცეცხლის შეწყვეტაზე შეთანხმდნენ. შეთანხმების მიუხედავად, ვრცელდებოდა ცნობები, რომ შეტაკებები კვლავ გრძელდებოდა.
კერძოდ, ბატკენის პოლიციის წარმომადგენელმა AFP-ს სატელეფონო საუბრისას განუცხადა, რომ ცეცხლის შეწყვეტის შემდეგ, ღამის განმავლობაში სროლები გრძელდებოდა, თუმცა „არა ინტენსიურად“.
ორივე მხარემ ცეცხლის შეწყვეტის ახალ შეთანხმებას პირველ მაისს მიაღწია.
ბოლო ინფორმაციით, საზღვარზე სტაბილური ვითარებაა და ყირგიზეთის და ტაჯიკეთის თავდაცვის სამინისტროების ოფიცერთა ერთობლივი კომისია აგრძელებს დაკვირვებას იმ ტერიტორიაზე, სადაც კონფლიქტი მიმდინარეობდა.
|დაღუპულთა და დაშავებულთა რაოდენობა
BBC-ის ინფორმაციით, სასაზღვრო კონფლიქტის შედეგად დაღუპულთა რიცხვი 46-მდე გაიზარდა. ასობით ადამიანი დაზარალდა. დაინგრა ათობით სახლი.
ყირგიზეთის მონაცემებით, დაღუპულთაგან 34 მათი მხარიდანაა, ხოლო 12 ტაჯიკეთის.
თავად ტაჯიკეთი დაშავებულთა და დაღუპულთა შესახებ ინფორმაციას არ ავრცელებს.
კონფლიქტის შედეგად ბატკენის ოლქის სოფლებში დამწვარია სკოლები, მაღაზიები, პოლიციის შენობები. განხორციელდა 10 000-მდე ადამიანის ევაკუაცია.
მომზადებულია BBC-ის მიხედვით
ავტორი: ნინი ტაველიძე, საინფორმაციო სააგენგო PTN.ge
