ჯანდაცვის მინისტრის მოადგილის, თამარ გაბუნიას განმარტებით, „სინოფარმით“ აცრა შესაძლებელია პოლიკლინიკურ დაწესებულებებშიც. ამის შესახებ გაბუნიამ საკოორდინაციო საბჭოს სხდომის დასრულების შემდეგ განაცხადა.
„სინოფარმთან“ დაკავშირებული გვერდითი მოვლენები პროგნოზულად ყველაზე ნაკლებია და პრაქტიკულად ანაფილაქსიასთან დაკავშირებული რისკები არ არის. ადგილები დაემატება, რათა სწრაფად მოხდეს მოცვა“, – განაცხადა თამარ გაბუნიამ.
მისივე თქმით, მომავალში ქვეყანაში ვაქცინების დამატებითი დოზებიც შემოვა.
„საქართველოში ამჟამად გვაქვს „სინოფარმის“ ვაქცინა, ასევე ჩამოვიდა „სინოვაკი“, რომლის მოხმარებასაც ჯანმოს რეკომენდაციის შესაბამისად დავიწყებთ. უკვე გამოქვეყნდა რეკომენდაციები ვაქცინის ეფექტურობის შესახებ, რაც იმაზე მეტყველებს, რომ ორივე ვაქცინა ავტორიზაციას მალე მიიღებს. „ასტრაზეკენა“ არის ჩვენთვის მთავარი, ასევე მოსალოდნელია „ნოვავაქსის“ გააქტიურება მოლაპარაკების საშუალებით. ასევე ივნისში „კოვაქსიდან“ ველოდებით „ფაიზერს“ და მიმდინარეობს მოლაპარაკებები თავად „ფაიზერთან“, რომ დამატებითი დოზები მივიღოთ“, – განაცხადა თამარ გაბუნიამ.
