სირიაში ოკუპირებული აფხაზეთის “საელჩო” გაიხსნა. ინფორმაციას დე ფაქტო რესპუბლიკის „საგარეო საქმეთა სამინისტრო“ ავრცელებს.
დე ფაქტო უწყების ცნობით „საელჩოს“ საზეიმო გახსნას ესწრებოდა ოკუპირებული აფხაზეთის მინისტრთა საბჭოს თავმჯდომარის მოადგილე, „საგარეო საქმეთა“ მინისტრი, სირიის არაბთა რესპუბლიკის უცხოეთში მცხოვრებ თანამემამულეთა საქმეთა მინისტრი ვადილ ალ მუალემი, სირიის არაბთა რესპუბლიკის საგარეო საქმეთა მინისტრის მოადგილე აიმან სულენი და სირიის არაბთა რესპუბლიკაში აკრედიტებული რუსეთის ფედერაციის, ვენესუელის და კუბის ელჩები.
ოკუპირებული აფხაზეთის „საგარეო საქმეთა სამინისტროს“ თანახმად საზეიმო ღონისძიებაზე დე ფაქტო რესპუბლიკის „ელჩმა“ სირიაში ბაგრატ ხუტაბამ აფხაზეთისა და სირიის თანამშრომლობის მრავალწლიან ისტორიაზე ისაუბრა.
ე.წ საელჩოს გახსნას საქართველოს საგარეო საქმეთა სამინისტრო გამოეხმაურა. როგორც უწყების განცხადებაშია აღნიშნული, სირიაში ოკუპირებული აფხაზეთის ე.წ. საელჩოს გახსნა წარმოადგენს იმ სრულიად უკანონო გადაწყვეტილების გაგრძელებას, რომელიც ასადის რეჟიმმა რუსეთის ზეწოლის შედეგად მიიღო 2018 წელს.
