„ძალიან კარგია, როდესაც ოპოზიციის ძალიან დიდი ნაწილი ამ იდეას, რომელიც გულისხმობს სირცხვილის კოლიდორების მოწყობას საჯაროდ გაემიჯნა“, – ამის შესახებ თეა წულუკიანმა აჭარის ტელევიზიის ეთერში, ვახო ხუზმიაშვილის გადაცემა „თავისუფალ სივრცეში“ სტუმრობისას განაცხადა.
მისივე თქმით, არჩევნების მეორე ტურზე საარჩევნო უბნებზე სირცხვილის დერეფანის გაკეთება ოპოზიციის მხრიდან, საკუთარი ხალხის შეურაცხყოფაზე მიუთითებს.
„ჩემი მხრიდან გეტყვით, რომ ე.წ. სირცხვილის დერეფნის მოწყობა არის სამარცხვინო აზრი, იმიტომ რომ არასდროს, დემოკრატიულ საზოგადოებაში პოლიტიკოსი არ უწყრება და უბრაზდება საკუთარ ხალხს, წინააღმდეგ შემთხვევაში მისი ადგილი პოლიტიკაში არ არის. როგორც ჩვენს ამომრჩეველს აქვს პატივსაცემი აზრი იმ არჩევანთან დაკავშირებით, რაც მან გააკეთა, ასევე, მიუხედავად იმისა, რომ ჩემთვის აბსოლუტურად გაუგებარი შეიძლება იყოს როგორ შეიძლება სააკაშვილს უჭერდე მხარს, ვინც ამ არჩევანს აკეთებს ეს მათი არჩევანია, ისინიც ჩვენი მოქალაქეები არიან და მათ აზრსაც სჭირდება პატივისცემა. ამიტომ, ვფიქრობ რომ ამ იდეას განხორციელება არ უწერია, რადგან ის იქნა უკვე უკუგდებული ოპოზიციის დიდი ნაწილის მიერ და ძირშივე სამარცხვინო აზრია, საკუთარ ხალხს მოუწყო სირცხვილის დერეფანი“, – განაცხადა წულუკიანმა.
