დღეს აჭარის განათლების სამინისტრომ ახალი პროექტის განხორციელება დაიწყო, რომელიც სმენადაქვეითებული ბავშვების ტრანსპორტირების პროგრამას გულისხმობს.
აჭარის განათლების სამინისტროს ინფორმაციით, გაფორმდა ხელშეკრულება და ყოველკვირეულად მოხდება სმენადაქვეითებული მოსწავლეების ტრანსპორტირება ქუთაისში მდებარე სკოლა-პანსიონში.
„ქუთაისში არის სკოლა-პანსიონი, სადაც სმენადაქვეითებული ბავშვები სწავლობენ. მათ იქ ჟესტურ ენას ასწავლიან. ბავშვები იქ არიან ორშაბათიდან პარასკევის ჩათვლით, შაბათ-კვირას კი სახლში შეუძლიათ დაბრუნება. აჭარის განათლების სამინისტროს მშობლებმა მიმართეს თხოვნით და განაცხადეს, რომ მათთვის ტრანსპორტირება პრობლემას წარმოადგენდა, გარკვეულ ხარჯებთანაც იყო დაკავშირებული.
განათლების სამინისტროს გადაწყვეტილებით, ამ ბავშვებს დღეიდან მოემსახურება ტრანსპორტი, ორშაბათს დილით ჩაიყვანს ქუთაისში და პარასკევს ჩამოიყვანს. ვფიქრობთ, რომ ეს ძალიან მნიშვნელოვანია, ბავშვები იქ სწავლობენ და ხელი არ შეეშლებათ განათლების მიღებაში“, – აცხადებენ აჭარის განათლების სამინისტროში.
ამ ეტაპზე აღნიშნული პროგრამით რვა მოსწავლე სარგებლობს. თუმცა, განათლების სამინისტროს ინფორმაციით, თუ კი მსურველები გამოჩნდებიან, მათი ტრანსპორტირებაც განხორციელდება.
„დღეს სამინისტრომ დაიწყო ახალი პროექტის განხორციელება, რომელიც გულისხმობს ჩვენი რეგიონიდან სმენადაქვეითებული ბავშვების ტრანსპორტირებით უზრუნველყოფას ქუთაისის 45-ე საჯარო სკოლაში.
მოსწავლეებს ექნებათ შესაძლებლობა უქმეებზე საკუთარ ოჯახებში გაატარონ დრო“, – განაცხადა აჭარის განათლების მინისტრმა მაია ხაჯიშვილმა.
ავტორი: ნაირა ქობულაძე
