ოკუპირებული გაგრის რაიონის სოფელი აიბღა, რომელიც საქართველო-რუსეთის სახელმწიფო საზღვრის ორივე მხარეს მდებარეობს, კვლავ განხილვის საგანია.

სოფლის ნაწილს, რომელიც სოჭის მხარესაა მოქცეული (აიბღას მდინარე ფსოუ შუაზე კვეთს), რუსეთი სათაოდ იჩემებს, მაშინ როცა აფხაზები აცხადებენ, რომ ეს მათი ტერიტორიაა.

სოფლის თემა ჯერ კიდევ 2010 წელს გააქტიურდა.

რუსული საინფორმაციო პოლიტიკა, კერძოდ, მედიაში, მიმართული იყო იქეთკენ, რომ ფართოდ გაშუქებულიყო სოფელ აიბღას მცხოვრებთა წუხილი იმასთან დაკავშირებით, რომ აფხაზებისაგან შევიწროებულები, ისინი სოფელში კრემლის იურისდიქციის დამყარებას ითხოვდნენ.

ამ თემასთან დაკავშირებით სწორედ 2010 წლიდან არსებობს ე.წ. სახელმწიფო საზღვრის დელიმიტაციის თაობაზე მომუშავე რუსულ-აფხაზური ორმხრივი კომისია, რომელმაც მიიღო გადაწყვეტილება, რომ საკითხის საბოლოოდ გარკვევამდე და შეთანხმებამდე არ მიმართონ ისეთ ცალმხრივ ქმედებებს, რომლებიც დააზარალებენ მოლაპრაკაებათა პროცესს.

ამის მიუხედავად, სოჭის მერმა სოფელ აიბღაში სტუმრობის დროს განაცხადა, რომ სოჭის მერია სოფელში საკომუნიკაციო და სხვა ობიექტების აღდგენას დაიწყებს და ხაზი გაუსვა, რომ აიბღა ქალაქ-კურორტ სოჭის შემადგენლობაში შედის.

ამავე ცნობით,2021 წლის მაისში სოფელ აიბღას ანექსია ოფიციალურად გაფორმდა, როდესაც მისი ზედამხედველობა კრასნოდარის ოლქის გამგებელს დაევალა.

ავტორი: თეა შონია