ნატოს გენერალურმა მდივანმა, იენს სტოლტენბერგმა განაცხადა, რომ რუსეთი თავისი მეზობლების, საქართველოსა და უკრაინის წინააღმდეგ სამხედრო ძალას იყენებს.
„მე ვერ ვხედავ რუსეთის მხრიდან ალიანსისთვის უშუალო სამხედრო საფრთხეს, თუმცა ვხედავ რუსეთს, რომელიც თავს იმკვიდრებს და თავისი მეზობლების, საქართველოსა და უკრაინის წინააღმდეგ სამხედრო ძალას იყენებს“, – აღნიშნა ნატოს გენერალურმა მდივანმა ფრანგულ გამოცემა Le Point-სთვის მიცემულ ინტერვიუში.
იენს სტოლტენბერგის თქმით, რუსეთი გერმანიისა და ნორვეგიის პარლამენტების წინააღმდეგ განხორციელებული კიბერშეტევების უკან იდგა.
„რუსეთმა ქიმიური იარაღი გამოიყენა დიდ ბრიტანეთში ადამიანების მოსაკლავად. თუნდაც რუსეთი ისეთი ძლევამოსილი არ იყოს, როგორც საბჭოთა კავშირი იყო, რუსეთი ბირთვულ იარაღს ფლობს“, – განაცხადა ნატოს გენერალურმა მდივანმა.
იენს სტოლტენბერგმა ასევე გააკრიტიკა თურქეთის მიერ რუსული საზენიტო-სარაკეტო კომპლექსი С-400-ის შეძენა.
„თურქეთი ნატოს მნიშვნელოვანი მოკავშირეა, რომელსაც სტრატეგიული გეოგრაფიული მდებარეობა აქვს. მნიშვნელოვანია თურქეთის ალიანსში შენარჩუნება“, – განაცხადა ნატოს გენერალურმა მდივანმა.
