მაკო გომურის განცხადებას ჯანდაცვის მინისტრის მოადგილე თამარ გაბუნია გამოეხმაურა.
მისივე განმარტებით, ისინი მზად არიან ყველა საჭირო სერვისის გაწევისთვის.
„საგანგებო მდგომარეობების მართვის სამსახურის მართვის ახალი ხელმძღვანელი იქნება აუცილებელად მასთან კომუნიკაციაში, ისევე, როგორც ამ კომუნიკაციისთვის მზად არის მინისტრი, მზად ვარ მე და ყველა ის თანამშრომელი, რომელიც შესაძლოა ჩაერთოს მისი ჯანმრთელობის პრობლემების მოგვარების საკითხში.
აქამდე რა კომუნიკაციის ხარვეზებზეა საუბარი, ამას უწყება შეისწავლის, თუმცა, ამ მომენტისთვის, ჩვენ არანაირ შეფერხებას არცერთ შემთხვევაში არ მოველით. ის, რომ პასუხისმგებლობა სახელმწიფოს მხარესაა მისი ჯანმრთელობის მდგომარეობაზე ზრუნვის, როგორც ფინანსურად, ისე ნებისმიერი სხვა კუთხით, ეს საკითხი ძალაშია და ამას ბოლომდე მივიყვანთ. თუ იყო რამე შეფერხება, ის დღესვე გამოსწორდება,”- განაცხადა თამარ გაბუნიამ.
ცნობისთვის, გუშინ მაკო გომურმა, სოციალურ ქსელში დაწერა, რომ თვალის პროთეზი გაუტყდა და გერმანიაში გეგმიური ვიზიტიც უწევს, თუმცა, ამ დრომდე, უწყებიდან ვერ იღებს ინფორმაციას, როდის მოხდება მისი გამგზავრება.
