თბილისში 27 ოჯახს, რომელსაც საცხოვრებელი ფართის დაკანონების პრობლემა ჰქონდა, დღეს ბინები გადაეცემა. ამის შესახებ დედაქალაქის მერმა თბილისის მთავრობის სხდომაზე განაცხადა.
„ჩვენ ძალიან ბევრ კარგ, მნიშვნელოვან პროგრამებს ვაფინანსებთ იმისთვის, რომ დავეხმაროთ იმ ოჯახებსა და ადამიანებს, ვისაც ყველაზე მეტად უჭირს. ერთ-ერთი მიმართულება, რომელსაც ამ რთულ ვითარებაში, პანდემიის პირობებში დაფინანსების თვალსაზრისით ერთი თეთრი არ დაკლებია, ეს იყო ჯანდაცვისა და სოციალური მიმართულება. წლევანდელ ბიუჯეტშიც ერთ-ერთი მთავარი პრიორიტეტი გახლავთ ამ ადამიანების და ოჯახების დახმარება, რომ მაქსიმალურად შევუმსუბუქოთ არსებული მდგომარეობა.
ამ პროექტის ფარგლებში ერთ-ერთი კარგი და მნიშვნელოვანი მიმართულება არის საცხოვრებელი ფართის დაკანონება სიმბოლურ ფასად, ერთ ლარად, იმ ოჯახებისთვის, რომლებიც წლების განმავლობაში ცხოვრობს ამ ბინებში. ხაზი მინდა გავუსვა, რომ კატეგორიულად მიუღებელია სახელმწიფო მიწების მიტაცება და უკანონო მშენებლობები.
გვაქვს პროგრამა სადაც 6-7 მილიონი ლარი იხარჯება იმისთვის, რომ ის ოჯახები, ის ადამიანები ვისაც არ აქვს სახლი, არის სოციალურად შეჭირვებული დავეხმაროთ და იჯარით გავიყვანოთ, მაგრამ არ დავუშვებთ იმას, რომ სახელმწიფო ქონების გატაცება და შემდეგ შენობა-ნაგებობების განთავსება მოხდეს.
27 ოჯახს რომლებიც წლების განმავლობაში დაკანონების პრობლემა ჰქონდათ, სიმბოლურ ფასად, ერთ ლარად გადაეცემათ საცხოვრებელი ბინები, მოხდება დაკანონება. ამ მიმართულებით 1 500-ზე მეტ ოჯახს უკვე დავეხმარეთ“, – განაცხადა დედაქალაქის მერმა.
