მეათე მოწვევის პარლამენტში ისუტიციის ყოფილი მინისტრი, თეა წულუკიანი განათლების, მეცნიერებისა და კულტურის კომიტეტის თავმჯდომარე იქნება. ამის შესახებ ქართული ოცნების აღმასრულებელმა მდივნმა, ირაკლი კობახიძემ განაცხადა.

თეა წულუკიანმა იუსტიციის მინისტრის თანამდებობა 29 სექტემბერს დატოვა, 27 ოქტომბერს კი განაცხადა, რომ აღნიშნულ პოსტზე არ დაბრუნდება და იქნება პარლამენტში.

პარტია “ქართული ოცნების” აღმასრულებელმა მდივანმა ირაკლი კობახიძემ ბრიფინგზე ასევე დაასახელა, ვინ რა თანამდებობას დაიკავებს პარლამენტში. საპარლამენტო თანამდებობები ასე გადანაწილდა:

მე-10 მოწვევის პარლამენტის თავმჯდომარე არჩილ თალაკვაძე იქნება, პარლამენტის პირველი მოადგილის თანამდებობას კი გიორგი ვოლსკი დაიკავებს. პარლამენტის თავმჯდომარის მოადგილეები იქნებიან კახაბერ კუჭავა, რომელიც საგარეო მიმართულებით იმუშავებს და ასევე, დავით სერგეენკო.

საპარლამენტო უმრავლესობის ლიდერის პოსტს ირაკლი კობახიძე ჩაიბარებს, ფრაქცია “ქართული ოცნების” თავმჯდომარე კი მამუკა მდინარაძე იქნება.

რაც შეეხება მე-10 მოწვევის პარლამენტს, იგი ხვალ, 11 დეკემბერს შეიკრიბება.