ინფექციური საავადყმოფოს დირექტორი რამდენიმე დღის წინ, აჭარაში, „ნაციონალური მოძრაობის“ მიერ გამართულ ღონისძიებას ეხმაურება, რომელიც ექიმების რეკომენდაციების დარღვევით ჩატარდა.
თენგიზ ცერცვაძის განცხადებით, კარგი იქნებოდა შეკრება სოციალური დისტანციის დაცვით და პირბადეების მოხმარებით ჩატარებულიყო. მისივე თქმით, მსგავსი პრინციპით ჩატარებული პოლიტიკური აქტივობები ვირუსის გავრცელების მიმართულებით მნიშვნელოვან რისკს წარმოადგენს.
„არჩევნები ზრდის რისკებს იმ ერთი მიზეზის გამო, როდესაც საარჩევნო კამპანია ძალიან აქტიურ სტადიაშია. საარჩევნო კამპანია მოიცავს ხალხმრავალ შეკრებასაც, ამის მაგალითი რამდენიმე დღის წინ ბათუმში გვქონდა, სადაც ხალხმრავალი შეკრება ისე გაიმართა, რომ არ იყო მიღებული ელემენტარული ზომები. რა მოხდებოდა, რომ ზუსტად ისეთი შეკრება გამართულიყო – ისეთივე შედეგი იქნებოდა პარტიის მხარდამჭერებისთვის ყველას ნიღაბი რომ ჰქონოდა გაკეთებული. რა თქმა უნდა, იმ რეგულაციებს, რომელიც რბილია და არ არის დრაკონული, ყველა არ ასრულებს, მით უმეტეს, საარჩევნო პერიოდში. თვითონ არჩევნები არ ქმნის რისკებს, საარჩევნო უბნებზე ყველაფერი დალაგებულია, ისეთი ზომებია მიღებული საარჩევნო ყუთებზე პრევენციის თვალსაზრისით, რომ არავინ დაინფიცირდება. საარჩევნო კამპანიის პერიოდი შეიცავს რისკებს“, – განაცხადა თენგიზ ცერცვაძემ.
