აჭარის მთავრობის თავმდომარე თორნიკე რიჟვაძე ბათუმში განთავსებულ „პატრიოტთა ალიანსის” საარჩევნო ბანერებს გამოეხმაურა. მისი განცხადებით საქართველოს რუკის დამახინჯება საარჩევნო ბანერზე მიუღებელია.
„ეს არის აბსოლუტურად მიუღებელი შინაარსის ბანერები, განცხადებებიც და რა თქმა უნდა ამას ხალხი ადეკვატურად შეაფასებს. ამავე დროს მიუღებელია, რომ ეს რაღაც პოლიტიკური პოპულიზმის საგნად აქციეს. თქვენ იცით, როგორც კი გამოჩნდა ეს ბანერები, მაშინვე მოახდინა მერიის შესაბამისმა სამსახურებმა რეაგირება.
რა თქმა უნდა, ჩვენ არ დავუშვებთ, რომ ქალაქში იყოს ამ შინაარსის მატარებელი ნებისმიერი ნიშანი ქალაქში. ყველას მინდა ვუთხრა და მოვუწოდო, რომ თუკი აჭარას აქვს რაიმე დასაცავი, როგორც საქართველოს მთავრობა, ასევე აჭარის მთავრობა გააკეთებს ყველაფერს მის დასაცავად და პოლიტიკური პოპულიზმი საგნად ეს ვერასდროს ვერ უქცევა”- განაცხადა მთავრობის თავმჯდომარემ.
ინფორმაციისთვის, დღეს ბათუმის სხვადასხვა უბანში „პატრიოტთა ალიანსის” ბანერები გამოჩნდა წარწერით „დაიცავი აჭარა!” ,„დაიცავი შენი წილი საქართველო” და საქართველოს რუკაზე აფხაზეთსა და სამაჩაბლოსთან ერთად აჭარის რეგიონი წითლად იყო მონიშნული.
ავტორი: ნაირა ქობულაძე
