აჭარის მთავრობის თავმჯდომარის თორნიკე რიჟვაძის განცხადებით, კორონვირუსის პრევენციის მიზნით დაწესებული შეზღუდვების შემსუბუქების ღონისძიებები ეტაპობრივად გაგრძელდება. ამის შესახებ თორნიკე რიჟვაძემ ბრიფინგზე განაცხადა.
„მოგეხსენებათ უკვე ორშაბათს, პირველი თებერვლიდან მთელი რიგი შეზღუდვების შემსუბუქებაა დაგეგმილი. ეს ეხება რა თქმა უნდა პირველ რიგში სასწავლო პროცესს და სასწავლო პროცესი აჭარაში განახლდება უკვე საკლასო ოთახებში. ასევე აღდგება ბათუმში საზოგადოებრივი ტრანსპორტი და ასევე შემსუბუქების ღონისძიებები ეხება სავაჭრო და კვების ობიექტებს ღია სივრცეებში. ეს მოგვცემს საშუალებას, რომ სტაბილური ეპიდვითარებიდან გამომდინარე ჩვენ უკვე ნელ-ნელა, თანმიმდევრულად მოვახდინოთ ეკონომიკის აღდგენა და რა თქმა უნდა მნიშვნელოვანია, რომ დღეს მათ შორის მიღებული გადაწყვეტილებით, რომელიც ეხება ავია მიმოსვლის აღდგენას. მთელი რიგი წესების გამარტივებას როგორც საქართველოს მოქალაქეებისთვის, ასევე უცხო ქვეყნის მოქალაქეებისთვის. ჩვენ უკეთ უნდა მოვემზადოთ და მაქსიმალურად ფრთხილად შევძლოთ ეკონომიკის აღდგენა პირველ რიგში რეგიონში. განსაკუთრებით მნიშვნელოვანია ტურიზმის და ტურისტულ ნაკადების მოზიდვა.
ამ მიმართულებით განსაკუთრებით მნიშვნელოვანია გადაწყვეტილებები, რომლებიც დაფუძნებულია დადებით კრიტერიუმზე. ეპიდემიოლოგებთან კონსულტაციების შედეგად ჩვენ ვაპირებთ, რომ თებერვლის თვეში წერტილოვანი შეზღუდვების შემსუბუქებასთან დაკავშირებით მივიღოთ შესაბამისი გადაწყვეტილებები, მაგრამ კიდევ ერთხელ ხაზგასმით აღვნიშნავ, რომ ის, თუ როგორ მოვახდენთ ეკონომიკის თანმიმდევრულ აღდგენას, ბევრად იქნება დამოკიდებული როგორც ბიზნესის პასუხისმგებლობაზე, ასევე რიგითი მოქალაქეების პასუხისმგებლობაზე და იმ წესების დაცვაზე, რომელიც მნიშვნელოვანია ვირუსის შეჩერებასთან მიმართებაში.
რაც შეეხება სასწავლო პროცესის განახლებასთან დაკავშირებით მიღებულ ზომებს, უკვე 9000-ზე მეტი მოქალაქის გატესტვა მოხდა, ძირითადად მასწავლებლების, ადმინისტრაციის თანამშრომლების. ეს ნაადრევი გამოვლენის საშუალებას მოგვცემს და მიზანმიმართული იქნება, რომ მოსწავლეებს ქონდეთ მაქსიმალურად უსაფრთხო გარემო ოთახებში.
საზოგადოებრივ ტრანსპორტთან მიმართებით, ბათუმის მუნიციპალიტეტმა გაატარა უკვე შესაბამისი ღონისძიებები და რა თქმა უნდა ყველა ეს ღონისძიება მიმართული იქნება ჩვენი მოქალაქეების უსაფრთხოებისკენ და მათი ჯანმრთელობის დაცვისკენ. ტურისტულ ობიექტებთან მიმართებით გვაქვს აქტიური კომუნიკაცია, მათ შორის ეკონომიკის სამინისტროსაც და მათთან კონსულტაციების შედეგად, მთელი რიგი წესების დაცვით აუცილებლად ვიმსჯელებთ კიდევ უფრო მეტი შემსუბუქების ღონისძიებების და კონკრეტული გადაწყვეტილებების მიღებისთვის.
კიდევ ერთხელ აღვნიშნავ, რომ სახელმწიფოსთან ერთად ბევრად არის დამოკიდებული ეს ყველაფერი როგორც კერძო სექტორის, ბიზნესის, ასევე რიგითი მოქალაქეების პასუხისმგებლობაზე და მათ მიერ რეკომენდაციების დაცვაზე, რათა შევძლოთ დადებითი დინამიკის შენარჩუნება და ამ კონკრეტული მიღწევიდან გამომდინარე შევძლოთ ეკონომიკის თანმიმდევრული აღდგენა, მათ შორის ტურიზმის სექტორის აღდგენაც“, – განაცხადა რიჟვაძემ.
ავტორი: ნაირა ქობულაძე
