ევროპული საბჭოს პრეზიდენტი, შარლ მიშელი საოკუპაციო ხაზის მოსაზღვრე სოფელ ხურვალეთში ჩავიდა.
როგორც შარლ მიშელმა საოკუპაციო ხაზთან ყოფნის დროს განაცხადა, ევროკავშირი საქართველოს სუვერენიტეტის და ტერიტორიული მთლიანობის ერთგულია.
„ჩემთვის ძალიან მნიშვნელოვანი იყო, ჩემი თვალით მენახა ადგილზე არსებული ვითარება. სწორედ ამიტომ ვარ აქ. თქვენ იცით, რომ ევროკავშირი საქართველოს სუვერენიტეტის და ტერიტორიული მთლიანობის ერთგულია. ასევე, ძალიან მნიშვნელოვანია ევროკავშირის სადამკვირვებლო მისიის როლი, რათა შეძლებისდაგვარად, მაქსიმალურად ეცადოს სტაბილურობის შენარჩუნებას, ასევე წაახალისოს ნდობის აღდგენის ზომები. ვიცით, რომ სიტუაცია კომპლექსური და რთულია ადგილობრივი მოსახლეობისთვის. სწორედ ამიტომ ჩემთვის მნიშვნელოვანია, ვუთხრა ადგილობრივ მოსახლეობას – თქვენ მარტო არ ხართ. ევროკავშირი მშვიდობის, სტაბილურობის და უსაფრთხოების ერთგულია“, – აღნიშნა მიშელმა.
ცნობისთვის, ევროპის საბჭოს პრეზიდენტი, შარლ მიშელი საქართველოს პრეზიდენტს და პრემიერ-მინისტრს უკვე შეხვდა.
დღესვე დაგეგმილია შეხვედრები პარლამენტის თავმჯდომარესთან და პოლიტიკური პარტიების ლიდერებთან. ესტუმრება ევროკავშირის პროექტს, რომელიც მხარს უჭერს სოფლის მეურნეობისა და ღვინის სექტორის განვითარებას, ასევე გახსნის თბილისში ევროკავშირის წარმომადგენლობის ახალ ოფისს.
შარლ მიშელის ვიზიტი საქართველოში ხვალ, 2 მარტს დასრულდება.
