ეს ადამიანი ან იყიდეს ან შეიტყუეს ან ამ ადამიანს მთელი ცხოვრების ოცნება ჰქონდა, რომ რამენაირად პარლამენტში აღმოჩენილიყო, – ასე გამოეხმაურა პარტია “გირჩის” ერთ-ერთი ლიდერი ზურაბ ჯაფარიძე “პატრიოტთა ალიანსის” წევრის, ავთანდილ ენუქიძის პარლამენტში შესვლას.
ზურა ჯაფარიძის თქმით, თუ “პატრიოტთა ალიანსის” სიის მე-4 ნომერი, ავთანდილ ენუქიძე პარლამენტში შევიდა, ის “ქართული ოცნების” 91-ე დეპუტატი იქნება.
“მე არ ვიცი, ვინ არის ავთანდილ ენუქიძე, ცხოვრებაში არ გამიგია, არ მსმენია. არ მჯერა, რომ ხვალ შეიძლება აღმოჩნდეს, რომ ავთანდილ ენუქიძე არის ცნობილი ქართველი პოლიტიკოსი, რომელსაც სავსე აქვს თავი იდეებით, როგორ უნდა შეცვალოს ეს ქვეყანა და რაღაც რეფორმების პაკეტით შევიდა პარლამენტში და ხვალიდან დაიწყებს კანონების ინიცირებას. ხო გასაგებია, რომ ეს ადამიანი ან იყიდეს ან შეიტყუეს ამითი ან ამ ადამიანს მთელი ცხოვრების ოცნება ჰქონდა, რომ რამენაირად პარლამენტში აღმოჩენილიყო და პარლამენტის სავარძელი და კომფორტი, რომელსაც ეს თანამდებობა იძლევა, მიეღო. ან ეს არის, ან ის არის. მესამე ვარიანტი, რომ მნიშვნელოვან ინიციატივებს დააყენებს, მე მაგის არ მჯერა. ჩათვალეთ თუ ის შევიდა [პარლამენტში], იქნება “ოცნების” არა 90, არამედ 91 დეპუტატი. ეგ არის და ეგ”, – აღნიშნა ჯაფარიძემ.
