პარტია “მოქალაქეების” გენერალური მდივანმა ლევან იოსელიანმა პარტიებისათვის დაფინანსების შეწყვეტასთან დაკავშირებით განაცხადა, რომ მათმა პარტიამ დაფინანსებაზე მას შემდეგ თქვა უარი, რაც მისივე თქმით, არჩევნები გაყალბდა. იოსელიანის თქმით, პარტიებმა რომლებიც ბოიკოტის რეჟიმში არიან ფული არ უნდა მოითხოვონ.
“ჩვენ თავიდანვე უარი ვთქვით დაფინანსებაზე. თუ ვამბობთ რომ არჩევნები გაყალბდა და ბოიკოტის რეჟიმში ვართ, არ უნდა მოვითხოვოთ ამის სანაცვლოდ ფული. ჩვენ და კიდევ ერთმა პარტიამ უარი ვთქვით დაფინანსებაზე და ამაზე იმ პარტიებს უნდა ეფიქრათ, რომლებმაც დაფინანსებაზე დაწერეს განცხადება. სავარაუდო იყო, რომ სწორედ ასეთ ხურდას დაუბრუნებდა მათ “ქართული ოცნება”,”- განაცხადა პარტია “მოქალაქეების” გენერალური მდივანმა ლევან იოსელიანმა.
ცნობისთვის, პარტიას, რომელსაც საპარლამენტო მანდატები შეუწყდება, ან რომელიც საპარლამენტო მუშაობაში არ ჩაერთვება, სახელმწიფო დაფინანსება შეუწყდება ან ერთი წლით შეუჩერდება. შესაბამისი კანონპროექტების პაკეტი პარლამენტში ინიციატივის წესითაა შესული.
